Vilhjálmur prins hefur upplýst að hann hafi sett fram óvenjuleg og óhefðbundin nöfn þegar kom að því að nefna fyrsta barn sitt, erfingja bresku krúnunnar. Vilhjálmur prins og eiginkona hans Katrín eignuðust soninn Georg árið 2013, en mánuðina fyrir fæðingu hans veltu þau fyrir sér fjölda nafna.

Þetta kemur fram í nýrri ævisögu, William and Catherine: The Intimate Inside Story, eftir konunglega ritstjóra The Mirror, Russell Myers. Þar segir að hjónin hafi „varið klukkustundum“ í að rannsaka möguleg nöfn, og að Vilhjálmur hafi oft komið með afar óvæntar uppástungur.

Bókin, sem byggir á einkaréttarsamtölum við fólk innan hallarinnar, varpar nýju ljósi á stórar stundir í lífi hjónanna. Ein sú stærsta var þegar þau stigu út á tröppur St Mary’s-sjúkrahússins í Lundúnum og kynntu frumburð sinn fyrir heiminum.

Samkvæmt bókinni hófu Vilhjálmur og Katrín að undirbúa komu barnsins þegar Katrín var komin fimm mánuði á leið og ákváðu að halda kyni barnsins leyndu fram að fæðingu. Þau keyptu því barnavörur í hlutlausum litum. Hins vegar reyndist erfitt að komast að samkomulagi um nafn.

Myers skrifar að Katrín hafi helst viljað nafnið Alexander fyrir dreng eða Alexandra fyrir stúlku, sem var einnig millinafn Elísabetar drottningar. Vilhjálmur hafi hins vegar í einrúmi lýst yfir ósk um að eignast stúlku og viljað heiðra móður sína, Díönu prinsessu, með millinafni.

Samkvæmt heimildum bókarinnar skiptist Katrín á hugmyndum við vinkonur sínar sem nýlega höfðu eignast börn. Vinur gaf þeim jafnframt bók með barnanöfnum, sem þau flettu í klukkustundum saman, oft með hlátrasköllum þegar annað hvort þeirra kom með „enn furðulegri uppástungu“.

Konunglegar heimildir segja að Vilhjálmur hafi jafnvel byrjað fundi með fjölmiðlateymi sínu á að kasta fram nöfnum á borð við: „Hvað finnst ykkur um Rodney fyrir strák, eða kannski Graham?“, áður en hann sprakk úr hlátri.

Þrátt fyrir grín og óhefðbundnar hugmyndir valdi Vilhjálmur að lokum hefðbundnari leið. Hann hafði tvö nöfn á lokastigi fyrir son sinn: Georg og Lúðvík en fullu nafni heitir prinsinn ungi Georg Alexeander Lúðvík .

Ævisagan fjallar einnig um hvernig Vilhjálmur verndaði börn sín í kjölfar krabbameinsgreiningar Katrínar, hvernig hjónin brugðust við opinberum ásökunum Harrý prins og Meghan Markle, og ágreining Vilhjálms við föður sinn, Karl III, vegna frænda hans, Andrew Mountbatten-Windsor (áður Andrés prins).

Russell Myers segir bókina gefa óvenju náið yfirlit yfir líf hjónanna, allt frá kynnum þeirra í St Andrews-háskólanum til dagsins í dag, og sýni hvernig þau hafi mótað sýn sína á nútímalegt konungdæmi á tímum mikilla breytinga og óvissu.