Í nýjasta pistil sínum skrifar Ragga um opinberar persónur eða áhrifavalda á netinu.
Þegar þú ert opinber persóna eða áhrifavaldur á netinu með bloggsíðu, hlaðvarp, samfélagsmiðil og tölvupóstlista þá ertu stöðugt að berskjalda þig fyrir gagnrýni.
Að skrifa færslu á Fésbók og ýta á birtingarhnappinn með von í hjarta um að innihaldið verði einhverjum til gagns í heilbrigðara sambandi við sjálfsmynd, mat eða æfingar. Fólkið sem les í hljóði á skrifstofunni, á biðstofunni eða á klósettsetunni kinki kolli og brosi út í annað í staðinn fyrir að rúlla augum og skrolla áfram.
Að birta uppskrift á bloggi og krossa fingur að svangir magar, sælkerar og lekkeristar fái innblástur í girnileikann, í staðinn fyrir krepptar tær að fussa og sveia yfir asnalegum innihaldsefnum eða sponsoruðum hlekkjum.
Að setja inn myndband úr ræktinni á instagram story með hjartslátt yfir gagnrýnisröddum um líkamlegt útlit, tækni, þyngdir eða ákefð en vonast eftir þökkum fyrir hugmyndir og innblástur.
Að setja mynd á instagrammið með von um að hún fái örfá hjörtu sem þýða samþykki um að innihaldið hafi veitt.
Að skrifa pistil á Heilsuvísi til að fræða um sálfræði, kvíða, streitu, mataræði, æfingar, eða annað heilsustöff og setjast svo aftur á bak í sófann á meðan Siggi og Gunna skruma í gegn og þyki fróðlegt en ekki hjákátlegt hjóm úr stelpuskotti.
Að búa til þátt á hlaðvarpi um allskonar heilsukjaftæði með sérfræðingum á sínu sviði og senda svo út í kósmósið og finna hnútinn stækka í mallakút. Fólk að hlusta í einrúmi í ræktinni, í bílnum, í göngutúrnum og þú hefur ekki hugmynd um hvaða skoðun það myndar sér á þessu blaðri þínu.
Það er auðvelt að sitja í salnum og gagnrýna.
Það er erfitt að vera skapari og setja efni út í alheiminn.
Það er hugrekki að berskjalda sig á öldum netvakans með sögum úr persónulega lífinu, að deila strögglinu, að segja frá veseni og vandræðum.
Það er hugrekki að búa til efni sem veitir fróðleik og fræðslu og vona að það verði til gagns.
Þess vegna hætta margir við og stroka út það sem var skrifað.
Ýta aldrei á send takkann.
Ýta aldrei á publish.
Setja aldrei upp hlaðvarp.
Stofna ekki heimasíðu.
Hafa instagrammið áfram prívat.
En hugrakkasta fólkið eru þeir sem halda áfram og er drull… um það sem öðrum finnst.
Því við getum hvort sem er ekki stjórnað því.
Hugrekki er sá sem stendur á sviðinu.
Hugrekki er að láta slag standa þrátt fyrir hræðslu.
Þrátt fyrir stóradóm almennings.
Að hafa gjallarhorn í formi samfélagsmiðils sem nær til hundruða eða þúsunda eru forréttindi.
En það felur líka í sér risastóra berskjöldun fyrir gagnrýni, skoðunum og sleggjudómum.
Það verða alltaf einhverjir sem krulla efri vör, rúlla augunum og hnussa yfir því sem þú setur frá þér.
Ekki afsaka þig. Ekki bakka út. Ekki hætta. Ekki taka það sem sannleik. Ekki pakka í vörn.
Það eru miklu fleiri sem eru þakklátir, og kunna að meta það sem þú gerir.
Haltu áfram fyrir þá.
Vertu drull… um álit hinna.
Athugasemdir