Drekkt fyrir að eignast barn með mági sínum

Frumraun Þóru Kar­ítasar Árna­dóttur, bókin Mörk – saga mömmu, vakti athygli þegar hún kom út fyrir nokkrum árum, en í henni sagði Þóra Karítas örlaga­ríka sögu móður sinnar. Nú er von á annarri bók frá Þóru sem byggir sömu­leiðis á raun­veru­legum atburðum, aftökum við Drekk­ing­ar­hyl þar sem konum var drekkt fyrir duls­mál og blóð­skömm.

„Þetta er allt frekar óraun­veru­legt núna en á sama tíma ger­ist það svo­lítið hratt. Ég skil­aði inn hand­rit­inu í ágúst sem er svo­lítið seint fyrir jóla­bóka­flóðið en nú er verið að kanna hvort hægt verði að hraða bók­inni í búðir fyrir jól svo já, það er ekki laust við að það séu fiðr­ildi í mag­anum og spenn­andi að vita hvort það náist,“ segir Þóra Karítas sem hefur und­ir­ritað samn­ing við Forlagið vegna útgáfu nýrrar skáld­sögu.

Bókin byggir á raun­veru­legum atburðum, en hún segir sögu Þórdísar nokk­urrar Hall­dórs­dóttur sem hlaut þau skelfi­legu örlög að vera drekkt í Drekk­ing­ar­hyl. „Hug­myndin kvikn­aði í draumi sem ég ákvað að taka mark á,“ segir Þóra Karítas, þegar hún er spurð út í til­urð sög­unnar, „og úr varð að ég valdi að skrifa um eina konu af þeim átján sem voru teknar af lífi á tímum stóra­dóms á Íslandi. Fyrir val­inu varð Þórdís Hall­dórs­dóttir sem end­aði ævina í Drekk­ing­ar­hyl fyrir þá sök að hafa eign­ast barn með mági sínum eftir að hafa verið vinnu­kona á heim­ili systur sinnar.“

Hún við­ur­kennir að það hafi verið skelfi­legt að lesa sér til um þessa atburði. „Já, það er alveg gott að koma upp úr kaf­inu eftir þetta grúsk,“ segir hún.

Örlagaríkir atburðir

Þetta er önnur bókin sem Þóra Karítas sendir frá sér. Fyrri bók hennar Mörk – saga mömmu kom út árið 2015 og vakti athygli á sínum tíma og hlaut bæði jákvæða dóma og fínar við­tökur. Spurð hvort nýja bókin eigi eitt­hvað skylt með þeirri fyrri segir Þóra Karítas að vissar hlið­stæður séu fyrir hendi. „Já, að því því leyti til að þessi bók er inn­blásin af raun­veru­legri sögu og snýst að mestu um örlaga­ríka atburði í lífi íslenskrar konu,“ útskýrir hún. „Ég tek mér þó mun meira skálda­leyfi í þess­ari bók enda er ég að skrifa um atburði sem áttu sér stað í lok sext­ándu aldar og byrjun þeirrar sautj­ándu.“

Tayler Swift kemur við sögu

Og Þóra Karítas sækir inn­blástur víða, þar á meðal í vin­sæla dæg­ur­laga­texta. „Fyrstu setn­ing­una eða kafl­ann í bók­inni skrif­aði ég eftir að hafa séð í mat­ar­boði, inni á bað­her­bergi, snyrti­veski með áletr­un­inni So don´t you worry your pretty little mind, people throw rocks at things that shine,“ lýsir hún, en seg­ist ekki hafa vitað hvaðan kvótið kæmi, en það hafi hins vegar orðið til þess að hún varð að fara heim að skrifa. „Svo fann ég síðar út, með aðstoð frú Google, að kvótið væri í Taylor Swift og lagið hennar Ours,“ segir hún og hlær.

Löng meðganga

Aðspurð segir Þóra Karítas að bókin hafi verið í vinnslu í nokkurn tíma. „Já, en í tarna­vinnu með löngum pásum inn á milli þar sem ég sinnti öðrum verk­efnum,“ tekur hún fram. „Í maí 2017 fékk ég úthlutað litlu vina­legu lista­manna­húsi hjá Hvera­gerð­isbæ og var þar í heilan mánuð. Bóka­safnið í Hvera­gerði reynd­ist vera mik­ill gull­moli, það átti allar bæk­urnar sem ég þurfti að kíkja í til að kom­ast af stað, ann­ála auk bóka sem inni­héldu greinar sem höfðu verið skrif­aðar um Þór­dís­ar­málið. Svo vann ég einnig að bók­inni í einn mánuð í Kjar­vals­stofu í októ­ber sama ár, þannig að þessi bók hefur ferð­ast með mér víða og verið hluti af lífi mínu mjög lengi.“

Fékk spark í rassinn

Þóra Karítas segir að eflaust hefði hún ekki klárað bók­ina nema vegna þess að hún hlaut þrisvar sinnum úthlutun úr launa­sjóði lista­manna í þrjá mán­uði í senn, einka­styrk sem barst óvænt og svip­aði til einna lista­manna­launa, og svo frá Rit­höf­unda­sam­band­inu loka­styrk til að klára loka­sprett­inn. „Fyrir allt þetta er ég afar þakk­lát,“ segir hún og brosir, „því það gaf mér spark í rass­inn og styrkti ein­beit­ingar-, þrjósku- og úthalds­vöðvann.“

Hvenær reiknar hún svo með að bókin komi fyrir sjónir almenn­ings? „Vonandi í vetur,“ segir hún von­góð, „eða í besta falli þegar hún er alveg til­búin, það er að segja eftir próf­arka­lestur, umbrot, kápu­vinnu og prentun.“