Ríkið hefur greitt rúmar 16 milljónir króna fyrir snjallforrit Ferðagjafarinnar og þjónustu við forritið. Að frádegnum virðisaukaskatti nema greiðslurnar tæpum 13 milljónum króna.
Þetta kemur fram í svari Andra Heiðars Kristinsson, framkvæmastjóra Stafræns Íslands, sem haldið hefur utan um framkvæmd verkefnisins. Atvinnu- og nýsköpunarráðuneytið hefur greitt Yay ehf. áðurnefnda upphæð, nánar tiltekið 12.993.793 fyrir þá sem hafa gaman af tölum, fyrir snjallaforritið sem skiptist í fjögurra milljón króna þóknun fyrir forritun, 1.5 prósenta þjónustutekjur af hverri ferðagjör og svo aðrar tilfallandi greiðslur fyrir veitta viðbótarþjónustu vegna forritsins. Andri Heiðar bendir á að þjónustugjald Yay sé mun lægra en til dæmis greiðslukortafyrirtækjanna.
Allir einstaklingar 18 ára og eldri með lögheimili á Íslandi fengu Ferðagjöf að andvirði 5.000 krónur frá Þórdísi Kolbrúnu Reykfjörð Gylfadóttur ráðherra. Gjöfin er liður í því að styðja við bakið á íslenskri ferðaþjónustu í kjölfar kórónufaraldurs og efla íslenska ferðaþjónustu sem og hvetja landsmenn til að eiga góðar stundir á ferðalagi víðsvegar um landið.
Áður hefur verið upplýst að áætlaður kostnaður ríksins vegna Ferðagjafarinnar er 1.5 milljarður króna. Þegar gengið var til samninga við Yay var einnig gefið út að heildarkostnaður verkefnisins færi aldrei yfir 15 milljónir króna sem tryggði að kostnaðurinn væri undir útboðsmörkum ríksins.
Fjölmargir Íslendingar hafa nýtt sér Ferðagjöfina í sumar víða um landið. Þannig höfðu næstum 75 þúsund landsmenn nýtt sér gjöfina um miðjan síðasta mánuð. Ekki gekk þó öllum vel að sækja sér forritið í farsíma sína. Mikla óánægju mátti þó finna meðal fjölda Íslendinga sem gerði tilraun til að hlaða niður snjallsímaforriti Ferðagjafarinnar í farsímana sína. Margir hafa skilið eftir skoðun sína á fyrirkomulaginu í kommentakerfum, til dæmis í Play Store, og ljóst að mikill meirihluti þeirra sem þar tjáir sig er hundfúll.
Athugasemdir