Þessir fordæmalausu tímar hafa áhrif á ótrúlega margt, þar á meðal kynlífið. Að minnsta kosti fyrir þá sem ekki eiga maka. En það má bjarga sér á ótal vegu án þess að önnur manneskja, og mögulega COVID-smitberi komi þar nálægt.
Skyndikynni og vinir með ávinningi (e. friends with benefits) er eitthvað sem maður verður víst að láta eiga sig í miðjum heimsfaraldri COVID. Jú jú, fúlt er það en þó er óþarfi að láta bugast þótt kossar og knús með ókunnugum, eða svo gott sem, sé úr myndinni í augnablikinu. Sagði líka ekki einhver: „Sjálfs er höndin hollust?“ Stjórnvöld í New York og Washington DC hafa til dæmis sagt að sjálfsfróun sé öruggasta leiðin til að fá sér gott í kroppinn á meðan heimsfaraldurinn geisar.
Það má nota margt annað en Lóu Fimmboga til að gera vel við sig en það er eins í kynlífstækjabransanum og öðru að það er auðvelt að láta plata sig til að kaupa köttinn í sekknum. Svo má líka finna ýmislegt á heimilinu sem kostar ekki neitt en gleður.
Að míga í skóinn sinn er skammgóður vermir
Úrval kynlífstækja er mikið og fjölbreytt svo enginn þarf að kvíða þurrkatíð eða óttast að verða handlama næstu daga vegna áreynslu. Það má kaupa alls konar græjur af öllum stærðum og gerðum. Besta er svo að maður þarf ekki einu sinni að fara út úr húsi til að fjárfesta í einu slíku, það er bara hægt að panta á netinu og fá sent heim samdægurs.
Það er þó að ýmsu að huga þegar fjárfest er í slíku tæki, því þarna úti er líka alls konar dót og drasl sem ekkert er jákvætt við nema kannski verðmiðinn. En það er með hann eins og að míga í skóinn sinn; ódýr verðmiði er skammgóður vermir. Bíddu bara þar til græjan gefur sig og í stað þess að fá fullnægingu færðu raflost. Tala ég af reynslu? Mögulega.
Ekki kaupa köttinn í sekknum
Í dag eru langflest kynlífstæki, að minnsta kosti þau vönduðu, gerð úr umhverfisvænu silikoni sem auðvelt er að þrífa með ilmefnalausri sápu eða þartilgerðri kynlífstækjasápu. Eftirlíkingarnar eru gjarnan gerðar úr efni sem dregur auðveldlega í sig bleytu sem þýðir að þar geta óhreinindi auðveldlega safnast fyrir. Meiri raki þýðir meiri hættu á sveppa- eða bakteríusýkingu.
Þá geta gæðin til dæmis hvað varðar rafhlöðuendingu og kraft verið minni í eftirlíkingunum, og eru það pottþétt, en það sem verra er að í eftirlíkingarnar er oft notað þalat, efni sem talið er að geti valdið krabbameini svo sú ástæða ein og sér ætti að nægja til að maður forðist þær eins og heitan eldinn.
Þú munt örugglega ekki sjá ítarlegt, eða einu sinni rétt, yfirlit yfir innihaldsefnin sem eru í eftirlíkingunum. Oft eru þær nefnilega framleiddar undir litlu eftirliti sem þýðir að regluverkið er lítið eða jafnvel ekki neitt.
Það má líka redda sér á með hinu og þessu sem til er á heimilinu.
Ef þú átt maka (skyndikynni ekki í boði í heimsfaraldri manstu) þá kemur til dæmis viðarsleif sterk inn sem áhald til að flengja með, fast eða laust – nefndu það. Og já, nefndu það fyrst við maka þinn til að vera viss um að það sé stemning fyrir flengingu. Gúrkan í ísskápnum hentar vel sem dildó ef þú sérð ekki fram á að ætla að nota hana í salatið. Það er samt best að vefja plasti utan um hana, eða smokk, til að forðast bakteríusýkingu. Sturtuhausinn, þú veist handúðarinn, er líka tilvalinn að því er kynlífsráðgjafinn Rachel Needle segir. Þannig nái maður að slá tvær flugur í einu höggi: Verða hreinn og fá fullnægingu.
Athugasemdir