Kurt Zouma, varnarmaður í enska knattspyrnuliðinu West Ham, játaði sök vegna dýraníðs í tveimur ákæruliðum fyrir rétti í gær. Sky sports greinir frá þessu.
Myndbönd af Zouma fóru í dreifingu þar sem hann sést sparka í og kasta kettinum sínum yfir eldhúsið heima hjá sér. Þá sýndu myndböndin hann einnig slá köttinn í höfuðið og kasta skóm í hann. „Ég sver að ég mun drepa hann,“ heyrist Zouma segja á upptökunum.
Myndböndin voru tekin upp af yngri bróður Zouma og birt á samfélagsmiðlinum Snapchat.
Eftir að myndböndin fóru í dreifingu var Zouma ákærður fyrir dýraníð í þremur ákæruliðum. Hann játaði í gær sök í tveimur þeirra. Bróðir hans var einnig ákærður en kona sem hann hafði verið í samskiptum við vakti upprunalega athygli á myndböndunum. Hún er sögð hafa ætlað á stefnumót með bróðurnum en hætt við eftir að hann birti myndbandið. „Mér finnst ekki í lagi að slá kött, ekki hafa fyrir því að koma hingað í dag,“ segir í skilaboðum sem hún sendi honum. Bróðirinn játaði sök fyrir að hafa aðstoðað Zouma við að brjóta lög.
Saksóknari í málinu benti á að eftir að myndböndin komust í dreifingu hafi það færst í aukana að fólk væri að taka upp myndbönd af sér slá ketti og birta á samfélagsmiðlum.
Zouma hefur samþykkt að kettirnir hans tveir, sem eru af tegundinni Bengal, verði komið fyrir á nýju heimili.
West Ham sektaði Zouma vegna málsins og gáfu fé til níu dýravelferðarsamtaka í Bretlandi og öðrum löndum.
Athugasemdir