Talsmaður milljarðamæringsins breska, Jim Ratcliffe segir ekkert til í því að tafir séu að byggingu glæsivillu Bretans í hlíðum Vopnafjarðar.
Heimildir Austurfréttar herma að miklar tafir séu á byggingu villunnar sem hugsað er sem veiðihús. Meðal ástæða er það að hönnun byggingarinnar er enn að taka breytingum þrátt fyrir að framkvæmdir við bygginguna hafi hafist seint síðasta sumar. Samkvæmt Austurfrétt undrast margir heimamenn fámennið sem sjáanlegt er á byggingarsvæðinu.
Gísli Ásgeirsson, framkvæmdarstjóri veiðifélagsins Six Rivers og talsmaður Jim Ratcliffe, neitar þessu alfarið og segir engar tafir á verkinu hingað til. Verkefnið sé í heild á áætlun þó þurft hafi að færa til verkefni og slíkt. Segir hann villuna eiga vera tilbúna eftir ár.
„Ég kannast ekki við neinar tafir að ráði en það var nýverið skipt út teyminu á staðnum því steypuvinnu er svo gott sem lokið,“ segir Gísli í samtali við Austurfrétt.
Bjartsýnn á sumarið
Gísli segir aðspurður að sumarið líti afar vel út en veiðileyfin í Vopnafirði hafa öll verið seld og það fyrir löngu. Segist hann afar bjartsýnn á gott sumar í veiðinni vegna þess að vorið hefur verið hlýrra í ár en mörg undanfarin vor.
„Ég hef verið mikið á þessu svæði allt frá árinu 1986 og nánast alltaf frá 1989 og oftar en ekki hefur verið kalt á þessum slóðum langt fram í júní og jafnvel lengur. Það þarf í engar grafgötur að fara að loftslagið hefur breyst töluvert á þessum tíma og nú er til dæmis afar lítil snjóbráð og ef það hlýnar ekki of mikið er það jákvætt fyrir laxinn. Ekki of kalt og ekki of heitt og þá mega menn eiga von á góðu sumri í veiðinni.“
Þá segir Gísli ennfremur að nú þegar stór laxveiðisvæði hafi lokast fyrir rússneskum veiðimönnum og verði líklegast lokuð útlendum aðilum næstu árin, þýði það að nú verði auðveldara fyrir Íslendinga að verða sér út um leyfi.
Athugasemdir