Kvennamál Jóns Baldvins Hannibalssonar, fyrrverandi ráðherra, eru víða í kerfinu þessa dagana. Rassastrokumál hans er á leið fyrir Landsdóm þar sem skorið verður úr um meint káf hans í matarboði á Spáni.
Fyrir Héraðsdómi Reykjavíkur rekur dóttir Jóns Baldvins, Aldís Schram, mál á hendur þeirri umdeildu og harðskeyttu Agnesi Bragadóttur, fyrrverandi blaðamanni Morgunblaðsins, sem lagðist á árar með Jón Baldvin og sakaði Aldísi um að hafa reynt að nauðga sér á geðdeild, „læst inni með froðufellandi kynlífsbrjálaðri graðkerlingu,“ eins og Agnes orðaði það. Óheflað orðalagið ber keim af óhróðri. Á geðdeildina hafði Agnes að sögn farið, góðmennskan uppmáluð, að beiðni Jóns Baldvins til að heimsækja og styðja Aldísi. Hún sagði frá hinu meinta áreiti um miðja nótt á Facebook löngu eftir atvikið og vildi leggja Jóni Baldvin þannig lið. Þá sakaði hún Aldísi um að vera að baki rassastrokumálinu. Aldís þvertekur fyrir að hafa áreitt Agnesi og sagðist ekki hneigjast til kvenna og allra síst Agnesar.
Gunnar Ingi Jóhannsson lögmaður sækir málið fyrir Aldísi. Agnes mætti fyrir dóminn í gær og upplýsti að hún hefði þjáðst eftir umrætt atvik. „Ég hef borið þennan ófögnuð innra með mér,“ hefur DV eftir henni. Hún kvaðst aðeins hafa sagt Jóni Baldvin og Bryndísi frá „atvikinu“ en stigið fram vegna herferðar Aldísar gegn föður sínum, Jóni Baldvin. Einhverjum þykir sem áburður Agnesar lýsi fordómum í garð geðsjúkra og sé í senn furðulegur og ósmekklegur og síst til þess fallinn að hjálpa Jóni Baldvin í þeim nauðum sem kvennamálin hafa kostað hann …
Athugasemdir