Rebekka vill bætur frá ríkinu vegna bólusetninga: „Ég fæ grátköst, mér líður illa, ég er oft döpur“

Rebekka Ósk Sváfn­is­dóttir ætlar í mál við íslenska ríkið og krefj­ast þar bóta eftir bólu­setn­ingar gegn Covid-19. Hún glímir enn við miklar auka­verk­anir eftir spraut­urnar sem birt­ast meðal ann­ars í stór­felldum rösk­unum á tíð­ar­hringnun. Síðan Rebekka var bólu­sett hefur hún verið á stans­lausum blæð­ingum síðan.

„Ég sjálf er núna, einu og hálfu ári seinna, á blæð­ingum fimmtán til tutt­ugu daga mán­að­ar­ins og það er búið að reyna allt til að stoppa hjá mér,“ segir Rebekka í sam­tali við Frétta­blaðið en hún hefur talað opin­skátt um hinar stans­lausu blæð­ingar sínar. Þar að auki fór hún að grennsl­ast fyrir um það hjá öðrum konum hvort þær væru að glíma við rugl­ing á tíð­ar­hringnum eftir covid-spraut­urnar. Þegar hún komst að því að kon­urnar hér á landi væru fjöl­margar sem glíma við þennan vanda stofn­aði hún Facebook-hóp­inn Tíða­hringur bólu­settra kvenna gegn C19 og þar eru um 2000 konur með­limir.

Sjá einnig: Rebekka Ósk verið á túr sam­fleytt í 48 daga: „Það er ekk­ert eðli­legt við þetta“

Nú hefur Rebekka ákveðið að fara í mál við ríkið og krefj­ast skaða­bóta. „Þetta er búið að hafa veru­leg áhrif á mitt líf og ég er búin að eyða fullt af pen­ingum í læknis­kostnað, lyf og lyfja­gjafir og ég er ekki sátt við það,“ segir hún og full­yrðir að reynt hafi verið að þagga málið niður:„Ég er mjög ósátt við þetta og mér finnst þeir skuldi þjóð­inni að þetta komi fram og að það verði talað um þetta. Þetta hefur áhrif á líf svo margra og við höfum enga ástæðu til að vera ljúga ein­hverju svona, þetta er bara kjána­legt.“

Sjá einnig: Rebekka á sárum blæð­ingum stans­laust í 53 daga: „Ég fæ grát­köst, mér líður illa, ég er oft döpur“

Í við­tali við Mannlíf ræddi Rebekka opin­skátt um líðan sína og til­fin­ingar eftir Covid-19 bólu­setn­ing­arnar.

„Tíða­hring­ur­inn hjá mér breytt­ist frá því að vera eðli­legur, 28 daga hringur í að ég var með blæð­ingar stans­laust í 53 daga og þeim fylgdu miklir verkir, þreyta og dep­urð. Svo kom stopp í 20 daga en svo byrj­aði ég aftur og hætti eftir átta daga og er ég í stoppi núna en hef verið með verki og slen alla daga síðan tíða­hring­ur­inn breytt­ist,“ sagði Rebekka og bætti við:

„Andlega hliðin var mjög góð fyrir bólu­setn­ingu og ég var lík­am­lega hraust og nán­ast aldrei veik. Raunin er ekki sú í dag. Ég fæ grát­köst, mér líður illa, ég er oft döpur og ég hef enga skýr­ingu á þessum til­finn­ingum.“