Stífdópaður ökumaður var handtekinn á höfuðborgarsvæðinu í gær. Lögreglan segir að hann hafi viðurkennt neyslu sína og að hann hefði „neytt kókaíns með morgunverðinum“. Þá kom einnig í ljós að ökumaðurinn hafði verið sviptur ökuréttindum og hefur ítrekað verið staðinn að því að aka réttindalaus. Sá brotlegi var látinn laus að að dregið hafði verið úr honum blóðsýni.
Búðarþjófar voru staðnir að verki í austurborginni. Hinir brotlegu stálu vörum fyrir rúmlega 40 þúsund krónur. Teknar voru vettvangsskýrslur af mönnunum sem síðan gengu þeir sína leið sem frjálsir menn.
Kallað var eftir lögreglu vegna innbrots í bifreið. Þjófurinn fannst stuttu síðar og var þýfið endurheimt og skilað til eigandans.
Borgaraleg handtaka átti sér stað í austurborginni. Innbrotsþjófur sást vera að athfana sig í verslun. Þegar hann varð þess var að fólk fylgdist með honum flúði hann inn á nýbyggingarsvæði en var þar eltur uppi af hópi „réttvísra borgara“ eins og segir í skýrslu lögreglunnar. Lögreglan mætti á svæðið og handtók manninn og leysti úr vörslu borgaranna. Hann hvílir nú á fleti í fangaklefa og verður yfirheyrður i dag.
Ökumaður í Hafnarvirði gerði það sér til gamans að reykspóla. Lögreglan greip hann og sektaði fyrir athæfið.
Óskað var aðstoðar lögreglu vegna líkamsárásar. Maður réðst á annan og sló hann ítrekað þar sem hann lá á jörðinni. Ofbeldismaðurinn var handtekinn og læstur inni í fangageymslu.
Athugasemdir