Reykjanesskaginn er ekki það eina sem skelfur þessa dagana því þingflokkur Vinstri grænna nötrar eftir að Bjarni Benediktsson utanríkisráðherra ákvað að Ísland sæti hjá í atkvæðagreiðslu hjá Sameinuðu þjóðunum um tillögu Jórdana um vopnahlé á Gaza svo hægt væri að veita Palestínumönnum mannúðaraðstoð. Fólk er kannski búið að gleyma því en Vinstri grænir voru einu sinni þekktir fyrir að vera hópur sem var á móti NATÓ og hvers kyns stríðum. Síðan VG komst að kjötkötlunum hefur lítið farið fyrir slíku tali og sjaldan hefur umsvif Atlantshafsbandalagsins verið meira á Íslandi og einmitt nú, undir styrkri stjórn Katrínar Jakobsdóttur forsætisráðherra.
Jódís Skúladóttir þingkona Vinstri grænna mætti á mótmælafund á laugardaginn, eftir að afstöðuleysi Íslands í atkvæðagreiðslunni var orðin ljós. Þar klappaði hún undir ræðum þar sem ítrekað var kallað „Ekki í mínu nafni“ og fleiri slagorð gegn ákvörðun utanríkisráherrans. Jódís er mikill friðarsinni og hefur lengi stutt málstað Palestínu og því er nokkur greinilegt að hún er ekki ánægð með Bjarna Benediktsson núna. Það sama má segja um Steinunni Þóru Árnadóttur samflokkskonu Jódísar en eiginmaður hennar, Stefán Pálsson er fyrrverandi formaður Samtaka hernaðarandstæðinga og núverandi meðstjórnandi og annálaður stuðningsmaður Palestínu.
Sjálf Katrín Jakobsdóttir var á árum áður áberandi stuðningsmaður Palestínu. Nú er spurningin bara sú, mun þessi óánægja flokksins hafa einhver áhrif á stjórnarsamstarfið? Miðað við það yfirklór sem fólk hefur orðið vitni að síðustu daga, er það harla ólíklegt. Vinstri grænir virðast telja nóg að gefa út yfirlýsingu þar sem flokkurinn segist andsnúinn hjásetu Íslands. Það er veisla hjá Samfylkingu og Sósíalistaflokknum sem styrkja sig á kostnað VG …
Athugasemdir