Leynigestur mun mæta í miðvikudagsgöngu Ferðafélags Íslands á Úlfarsfell klukkan 18 í dag. Veðurhorfur eru góðar og reikna má með stjörnubjörtum himni.
Gengið verður undir leiðsögn frá stærra bílastæðinu í Úlfarsárdal. Við upphaf göngunnar verður sá verðlaunaður sem fyrstur varð til að giska á nafn huldumannsins. Verðlaun eru veitt hinum getspaka sem verður að mæta á staðinn til að hreppa hnossið.
Vísbendingar um leynigestinn eru meðal annars Ófeigsfjörður og Brekkan og Slippurinn. Nánar um viðburðinn og aðrar vísbendingar er að finna hér.
Hefðbundin dagskrá er á göngunni. Á efsta tindi flytur leynigesturinn, sem er þjóðþekktur, frumsamið ljóð og kynnir einnig nýútkomið verk sitt sem vakið hefur athygli. Að vanda verður tekið lagið og æfingar kenndar við Haukinn iðkaðar.
Gönguhraði er við allra hæfi. Gangan er fjórir kílómetrar og hækkun um 220 metrar.
Vikulegar göngur undir merkjum Hliðarskrefsins og í boði Ferðafélags Íslands hafa verið á Úlfarsfell í átta ár. Fjölmargir leynigestir hafa komið við sögu á þeim tíma. Þar má nefna sakamáladrottninguna Yrsu Sigurðardóttur, Lilju Alfreðsdóttur ráðherra og Sóla Hólm skemmtikraft.
Allir eru velkomnir í gönguna. Muna að vera með höfuðljós og vel klædd til útivistar.
Athugasemdir