Leynigesturinn Sigmundur Ernir Rúnarsson týndist á Úlfarsfelli í gærkvöld þegar hann mælti sér mót við gönguhóp Ferðafélags Íslands. Hópurinn hafði af honum talsverðar áhyggjur sem reyndust óþarfar þegar hann kom boðum um það símleiðis að hann væri á röngunni, staddur Mosfellsbæjarmegin á fjallinu. Varð að ráði að hann myndi hitta hópinn og afhjúpa sig á efsta tindi. Fjölmargir náðu að giska á það hver gesturinn væri eftir vísbendingum. Göngugarpurinn Bjarnheiður Erlendsdóttir var fyrst þeirra sem mættu til að giska á Sigmund Erni sem færði henni nýju bókina sína, Í stríði og friði fréttamennskunnar, að launum.
Sigmundur flutti frumort ljóð sitt um Úlfarsfell og las úr bók sinni á toppnum áður en hann hélt niður fjallið, sömu leið og hann kom upp. Á næsta miðvikudag er aftur opin ganga á vegum Ferðafélagsins klukkan 18. Þá kemur til sögunnar nýr leynigestur. Þeir sem vilja spreyta sig á vísbendingum finna þær hér.
Ljóð Sigmundar Ernis:
Úlfarsfell
Greiðum fæti er stefnt á stafn
sem stundum safnar vindi.
Hann minnir á sitt eigið nafn
og ýlfrar hvasst á tindi.
Athugasemdir