Snorravaka verður haldin á Óbyggðasetri Íslands að Egilsstöðum í Fljótsdal, sunnudaginn 26. nóvember klukkan 16:00. Á vökunni verður minning Snorra Gunnarssonar þúsundþjalasmiðs heiðruð.
Snorri var fæddur á Egilsstöðum í Fljótsdal árið 1907. Hann fyrsta barn Gunnars Sigurðssonar og Bergljótar Stefánsdóttur. Þau eignuðust alls 14 börn sem öll fullorðnuðust. Níu þeirra bjuggu lengst af á bænum. Saga systkinanna er betur rakin á sýningu Óbyggðasetursins.
Snorri dvaldist á Egilsstöðum fram undir þrítugt en flutti síðan yfir í Jökuldal, bjó fyrst á Eiríksstöðum og síðar á Vaðbrekku áður en hann flutti aftur heim í Egilsstaði, þar sem hann bjó síðustu 20 árin en hann lést árið 1989.
Snemma var ljóst að Snorri væri afskaplega flinkur í höndunum. Átti síðar eftir að ferðast milli bæja, þar sem hann saumaði íslenska þjóðbúninginn á konur, byggði heilu húsin og gerði við klukkur, saumavélar og fleira. Hann var einnig liðtækur kvæðamaður.
Á Snorravökunni mun fólk úr Fljótsdal og Jökuldal segja frá Snorra, lífshlaupi hans og afrekum. Sýnd verða föt sem hann saumaði og munir sem hann átti auk þess sem spilaðar verða upptökur af honum í lifanda lífi.
Boðið verður upp á kjötsúpu og brauð auk þess sem gestir geta gengið í gegnum sýningu
Óbyggðasetursins. Aðgangseyrir er 2.500 krónur.
Athugasemdir