Á leið sinni til vinnu í gær náði Unnur Birna Karlsdóttir, forstöðumaður Rannsóknaseturs Háskóla Íslands á Austurlandi, ljósmynd af hrafni hvíla sig á hornum hreindýrs. Vakti ljósmynd Unnar Birnu talsverða athygli á samfélagsmiðlum – En ekki er allt sem sýnist.
Hreindýrstarfurinn sem hrafninn hvílir sig á er útilistaverk og er staðsett á klettabelti innan bæjarmarka Egilsstaða.
Ívar Ingimarsson var helsti drifkraftur þess að listaverkið varð að veruleika en það var afhent sveitarfélaginu árið 2020. „Tarfurinn minnir á einkenni Egilsstaða sem er hreindýrabær Íslands,“ sagði Ívar í samtali við Austurfrétt.
Verkið er byggt á teikningu Jóns Baldurs Hlíðberg og Unnar Erlingsson útfærði hugmyndina.
Skúlptúrinn er 2.5 metri að hæð og því um það bil 50 prósent stærri en hefðbundinn hreindýrstarfur og sést því vel frá þjóðveginum.
Athugasemdir