Baráttan um Bessastaði hefur tekið óvænta stefnu eftir að Halla Hrund Logadóttir orkumálastjóri tók forystu í könnunum. Margir höfðu talið að Katrín Jakobsdóttir, fyrrverandi forsætisráðherra, myndi hirða embættið nánast á silfurfati. Katrín nýtur virðingar sem mannasættir og er gjarnan góðsemin uppmáluð. Framboð Höllu setur strik í reikning Katrínar.
Katrín var með furðulegt útspil í þættinum Ísland í dag þar sem hún var spurð um sinn þátt í því að ákæra Geir Haarde fyrir afglöp í embætti í aðdraganda hrunsins. Geir var dæmdur sekur af Landsdómi en honum ekki gerð refsing. Nú segist Katrín sjá eftir framgöngu sinni. Hún er með móral. „Ég get alveg sagt þér það að ég myndi aldrei gera þetta svona aftur,“ sagði hún.
Stuðningsmenn Katrínar óttast að sagan endurtaki sig frá því Davíð Oddsson, fyrrverandi forsætisráðherra, bauð sig fram en var niðurlægður og hafnaði í fjórða sæti. Vandamál Davíðs var stjórnmálavafstur hans, klíkustarf í Seðlabankanum og ferill sem er vægast sagt umdeildur.
Þeir svartsýnustu úr stuðningsmannahópi Katrínar óttast að hennar bíði sömu örlög og toppbaráttan verði á milli Baldurs Þórhallssonar prófessors og Höllu Hrundar og Katrín endi í fjórða sæti rétt eins og aumingja Davíð sem situr uppi með ósigurinn sem pólitíska grafskrift og er á framfæri ekkju frá Vestmannaeyjum …
Athugasemdir