Málið sem varð Maríu Sigrúnu Hilmarsdóttur að falli í fréttaskýringaþættinum Kveik var sýnt í Kastljósi í gær. Óljóst er hvað varð til þess að Ingólfur Bjarni Sigfússon, ritstjóri Kveiks, stöðvaði umfjöllun fréttakonunnar í samráði við yfirmenn sína. Umfjöllun Maríu Sigrúnar dregur fram að Reykjavíkurborg missti af 10 milljörðum króna vegna samninga við olíufélögin um byggingarétt á lóðum þeirra. Hermt er að forsvarsmenn olíufélaganna hafi verið gáttaðir á örlæti borgarinnar við úreldingu bensínstöðvanna.
Vinátta Stefáns Eiríkssonar, fyrrverandi borgarritara og núverandi útvarpsstjóra, og Dags B. Eggertssonar, fyrrverandi borgarstjóra, er þekkt. Stefán mun hafa komið að málum sem borgarritari í upphafi þegar stigin voru fyrstu skrefin í samningum við olíufélögin. Þá liggur fyrir að núverandi borgarstjóri, Einar Þorsteinsson starfaði áður á RÚV. Þessi vinabönd kunna að hafa haft áhrif þegar sótt var að fjölmiðlakonunni, umfjöllunin stöðvuð, og hún rekin úr teymi Kveiks.
Niðurstaða umfjöllunar Maríu Sigrúnar er sú að meirihluti borgarstjórnarinnar hafi klúðrað málum og gefið frá sér stórfé. Í einhverjum tilvikum voru samningar um lóðir undir bensínstöðvar að renna út og borgin gat einfaldlega tekið þær til sín. Umfjöllunin átti svo sannarlega erindi fyrir almenningssjónir. Spurt er hvernig RÚV leysi málin gagnvart fréttakonunni forsmáðu.
„Auðvitað ótrúlegur slóðaskapur. Þetta er dæmigert fúsk og hér skorti alla fagmennsku,“ segir Hildur Björnsdóttir, oddviti Sjálfstæðisflokksins í Reykjavík, um málið. Skondin hlið á þessu er að eiginmaður Hildar, Jón Skaftason, sem er einn af ráðamönnum Skeljungs og Orkunnar, græddi stórfé fyrir hönd síns fyrirtækis á öllu þessu bralli …
Athugasemdir