Jón vill færa aðsetur forsetans til Akureyrar part úr ári: „Ég er með húsnæði í huga“

Jón Gnarr lýsti þeirri löngun sinni á fram­boðs­fundi í gær, að hann langi til þess að færa aðsetur for­seta Íslands til Akur­eyrar hluta úr ári.

Akureyri.net segir í frétt sinni að Jón hafi haldið fram­boðs­fund sinn í blíð­skap­ar­veðri við Kaffi Ilm í Skáta­gil­inu á Akureyri. Á fund­inum viðr­aði Jón hug­mynd sem ekki hefur komið fram áður. „Samkvæmt stjórn­ar­skrá skal aðsetur for­seta Íslands vera á Bessa­stöðum,“ sagði Jón við gesti fram­boðs­fund­ar­ins. „Mig langar hins­vegar að færa aðsetur for­set­ans víðar og byrja á Akureyri. Þetta er ekki stór skrif­stofa, nokkrar mann­eskjur sem fylgja. Ég sé enga ástæðu fyrir því að þetta ætti ekki að ganga. Í fram­haldi mætti skoða mögu­leik­ana á því að fara víðar. Það myndi auð­velda for­set­anum að vera í nánu sam­bandi við fólkið í land­inu. Þegar ég var á Akureyri að leika í Leik­hús­inu og dvaldi hérna um tíma, þá upp­lifði ég það að fá góða inn­sýn í líf fólks hérna.“

Jón sagð­ist vera með hús­næði í huga: „Ég er með hús­næði í huga, en ég ætla ekki að gefa neitt upp um það hér og nú. En ég væri ekki að segja þetta, ef mér væri ekki alvara.“

Ýmislegt fleira var rætt á fund­inum en kát­inu vakti þegar spurn­ing barst úr sal frá fyrr­ver­andi sam­starfs­manni Jóns úr Volvo-verk­smiðj­unni í Svíþjóð. Lýsti sá yfir áhyggjum vegna vinnu­sóknar Jóns en hann sagði for­seta­fram­bjóð­and­ann hafa mætt illa í vinn­una og spurði hvort hann ætl­aði að sýna sama kæru­leysi á Bessa­stöðum. Jóni var afar skemmt við spurn­ing­una og við­ur­kenndi strax að hafa mætt illa í vinn­una hjá Volvo og sagð­ist ætla að standa sig betur ef hann verður kos­inn for­seti.

Önnur mik­il­væg spurn­ing barst úr sal en við­staddir vildu vita hvort Jón myndi halda áfram með hinn goð­sagna­kennda útvarps­þátt Tvíhöfða, sem hann stjórnar ásamt Sig­ur­jóni Kjart­ans­syni en þætt­irnir hafa verið vin­sælir um ára­tuga­skeið. Sagðist Jón ekki sjá neina ástæðu fyrir því að Tvíhöfði þyrfti að hætta og lof­aði gest­unum að halda áfram með þátt­inn, þó hann færi á Bessa­staði.

Fundinum lauk með flutn­ingi Jóns á fram­boðslagi sínu um mið­aldra mann úr Vest­ur­bænum sem langar að verða for­seti.