Kris Kristofferson er látinn: „Þakka ykkur fyrir að elska hann í öll þessi ár“

Kris Kristoffer­son, sem náði vel­gengni sem bæði bylt­ing­ar­kenndur sveita­söngv­ari og kvik­mynda- og sjón­varps­stjarna í Hollywood, lést í gær, laug­ar­dag­inn 28. sept­em­ber, á heim­ili sínu í Maui á Hawaii. Engin dán­ar­or­sök hefur verið gefin upp en hann er sagður hafa lát­ist frið­sam­lega umkringdur fjöl­skyldu. Hann var 88 ára gam­all.

Fjöl­skylda hans sagði í yfir­lýs­ingu: „Það er með sorg í hjarta sem við deilum frétt­unum að eig­in­maður okkar/faðir/afi, Kris Kristoffer­son, lést á frið­sælan hátt laug­ar­dag­inn 28. sept­em­ber á heim­ili sínu. Við erum öll svo þakk­lát fyrir tíma okkar með honum. Þakka ykkur fyrir að elska hann í öll þessi ár, og þegar þið sjáið regn­boga, vitið þið að hann brosir niður til okkar allra.“ Yfir­lýs­ingin var birt fyrir hönd eig­in­konu Kristoffer­son, Lisu og hans átta barna, Tracy, Kris Jr., Casey, Jesse, Jody, John, Kelly og Blake; og barna­barna hans sjö.

Kyle Young, for­stjóri Country Music Hall of Fame and Museum, sagði: „Kris Kristoffer­son trúði því inni­lega að sköp­un­ar­kraft­ur­inn væri Guði gef­inn og að þeir sem hunsa eða afvega slíka heilaga gjöf séu dæmdir til að mis­takast og til óham­ingju. Hann pré­dik­aði að hug­ar­lífið gefur sál­inni rödd og síðan skap­aði hann verk sem gaf rödd ekki aðeins sálu hans heldur okkar líka. Meðal þeirra Kris leit upp til voru verð­launa­box­ar­inn Muhammad Ali, stór­skáldið William Blake og „Hill­billy Shakespe­are,“ Hank Williams. Hann lifði lífi sínu á þann hátt sem heiðr­aði og sýndi gildi hvers og eins þess­ara manna, og hann skilur eftir sig rétt­láta, hug­rakka og eft­ir­tekt­ar­sama arf­leifð sem rímar við þeirra.“

Kristoffer­son hafði þegar eytt nokkrum hóf­lega far­sælum árum í söngverkum Music City þegar hann sló í gegn sem höf­undur Country-smella á borð við „For the Good Times“ (Ray Price, 1970), „Sunday Morning Coming Down“ ( Johnny Cash, 1970) og „Help Me Make It Through the Night“ (Sammi Smith, 1971). Lag hans „Me and Bobby McGee“ náði efst á vin­sæld­ar­lista með fyrrum elsk­huga hans, Janis Joplin árið 1971, eftir ótíma­bært and­lát hennar.

Þá þótti Kris frá­bær leik­ari en hann lék í kvik­myndum á borð við Pat Garrett & Billy the Kid (1973), A Star is born (1976), Lone Star (1996), Blade (1998) en árið 1985 var hann til­nefndur til Ósk­arsverð­laun­anna fyrir tón­list­ina í kvik­mynd­inni Songwriter.