Engum dylst að ástandið í borgarstjórnarflokki Sjálfstæðisflokksins er með miklum endemum. Leiðtoginn, Hildur Björnsdóttir, nýtur ekki trausts sinna eigin manna og hefur ekki tekist að laða að fylgi. Flokkurinn, sem ætti að vera í stórsókn, er í fygiskrísu á sama tíma og meirihlutinn í borginni veltist um í vöruskemmumálinu og fleiru sem tengist mistökum og óstjórn.
Málsmetandi fólk hefur verið að leita að nýjum leiðtoga til að koma flokknum á sigurbraut. Einhverjir hafa staldrað við nafn Guðlaugs Þórs Þórðarsonar umhverfisráðherra en talið er að áhugi hans á verkefninu sé lítill sem enginn. Hann sé tekinn að eldast og letjast á langri leið.
Margir horfa til Áslaugar Örnu Sigurbjörnsdóttur vísindaráðherra. Lengi vel var Áslaug Arna kennd við humar og hvítvín en síðan þykir hún hafa styrkt sig nokkuð í sessi. Athygli vakti að hún snupraði Bjarna Benediktsson formann í Moggagrein þar sem hún líkti Sjálfstæðisflokknum við hið fallna risafyrirtæki Kodak sem ekki gerði sér grein fyrir því að filmur voru undanhaldi í ljósmyndun og stafræn tækni að taka yfir.
Það hugnast mörgum sjálfstæðismanninum að sjá kjaftfora Áslaugu sem leiðtoga í Reykjavík þar sem sóknarfæri fyrir flokkinn eru gríðarleg. Allt ræðst þetta þó af framvindunni í vetur og því hvort Bjarni Benediktsson ætlar að sitja áfram sem formaður í rústum eigin flokks …
Athugasemdir