Óvissustigi Almannavarna vegna aukinnar skjálftavirni í Bárðarbungu hefur nú verið lýst yfir. Var það gert af ríkislögreglustjóra í samráði við lögreglustjórann á Norðurlandi Eystra, Suðurlandi og Austurlandi.
Í tilkynningu frá Almannavörnum segir:
„Það að lýsa yfir óvissustigi þýðir að eftirlit er haft með atburðarás sem gæti á síðari stigum leitt til þess að heilsu og öryggi fólks, umhverfis eða byggðar verði ógnað.“
Samkvæmt RÚV er jarðskjálftahrinan sem varð í morgun sú kröftugasta frá síðustu eldsumbrotum í eldstöðinni en þá gaus í Holuhrauni frá 2014 til 2015.
„Hreyfingar í jarðskjálftunum samræmast aukinni þenslu vegna kvikusöfnunar sem hefur staðið yfir frá síðustu eldsumbrotum 2015,“ segir í færslu á vef Veðurstofu Íslands.
Þar kemur einnig fram að jarðskjálftavirknin í Bárðarbungu hafi farið vaxandi á síðustu mánuðum en fjórir skjálftar um eða yfir fimm á stærð urðu á síðasta ári. Þá hefur mælst samhliða því aukinn hraði í aflögun vegna kvikuinnstreymis undir eldstöðinni.
Mikil óvissa erum það sem gæti gerst en vatn gæti hlaupið undan jökli á mismunandi stöðum en mögulegt áhrifasvæði vegna eldgoss nær yfir þrjú lögregluumdæmi.
Deildarstjóri á Veðurstofunni, Kristín Jónsdóttir, segir of snemmt að segja af eða á hvort það muni gjósa og þá hvort það myndi gjósa undir jökli eða utan hans, lík og fyrir tíu árum, í Holuhraunsgosinu.
Athugasemdir