Þóra Kristín Ásgeirsdóttir, upplýsingafulltrúi hjá Íslenskri erfðagreiningu, skrifar pistil í dag um hina svokölluð vókmenningu og setur það í samhengi við samskipti Sólveigar Önnu Jónsdóttur, formanni Eflingar, og rithöfundarins Hallgríms Helgasonar á Samstöðinni.
Þar afneitaði Sólveig vókmenningu og því sem fylgir henni og kallaði Hallgrímur hana Trumpista i framhaldinu en baðst reyndar afsökunar á því síðar.
„Eins hvers staðar í baksýnisspeglinum grillir í upphaf woke tímabilsins og meToo byltingarinnar sem jákvæðs afls, valdeflingar þar sem að sjónir beindust að mannréttindum svartra, lesbía, homma, transfólks og annarra útsettra jaðarhópa, kynþáttafordómum, kynferðislegu ofbeldi og kúgun. Og það var mikilvægt,“ skrifar Þóra.
„Þeir sem áður höfðu enga rödd, fengu rödd, vald og áhrif, skiluðu skömminni og köstuðu af sér hlekkjunum,“ heldur hún áfram en segir að markaðshyggjan hafi sigrað og brennan hafi logað glatt.
„Allskyns "áhrifavaldar" tóku að sér, sjálfum sér til dýrðar, að vera böðlar á samfélagsmiðlum, Fleiri og fleiri fengu að kenna á því fyrir æ minni eða óljósari sakir. Fjölmiðlar nutu góðs af, stjórnmálin hrukku í gírinn enda var þetta bæði samfélagslega viðurkennt en síðan var þetta líka sniðugt tæki til að koma pólitískum andstæðingum fyrir kattarnef sem og samherjum sem þvældust fyrir á leið upp metorðastigann.“
Næst hafi tekið við ógnarstjórn góðmennskunar að mati Þóru. Fólk hafi í orðið hrætt að tjá sig og að hægri menn hafi nýtt vókmenninguna til hins ýtrasta. „Siðfræðingur Morgunblaðsins varð nánast fjölmiðlastjarna á einni nóttu enda duglegur að róta í sorpinu,“ nefnir Þóra sem dæmi.
„Það er orðin þröng á þingi við bálið og áhrifavaldarnir, ölvaðir af lækum og deilingum á samfélagsmiðlum, fleygja stundum hver öðrum á bálið, ýmist til að glæða logana eða fá meira olnbogarými sjálfir. Og allir sem gagnrýna brennufólkið eða finnst of harkalega gengið fram geta líka gert ráð fyrir að lenda í logunum.
Núna er Sólveig Anna formaður Eflingar, kallaður trumpisti og mannhatari fyrir að gagnrýna, harðasta wókið. Það er auðvitað hlálegt í ljósi þess að Efling er það verkalýðsfélag sem raunverulega hefur lagt sig í framkróka við að valdefla og styrkja hópa sem hafa orðið undir í samfélaginu,“ skrifar hún um formann Eflingar og hennar samskipti við Hallgrím.
Þóra telur að byltingin sé búin að éta börnin sín og að ungt fólk í dag sé dómharðara og hægri sinnaðra en áður. Þá trúi það ekki lengur á lýðræði.
„Ofbeldi og kúgun leiða alltaf af sér meira ofbeldi og kúgun, líka þegar góða fólkið heldur á vendinum.
"Woke" var í eðli sínu fallegt afl en það hefði aldrei átt að snúast um slaufun, kúgun og refsingar. Vegna þess að það býður heim, öfgum, hræðslu og hættulegri skoðanakúgun sem við sjáum hin nýju fasísku öfl vera að nýta sér til framdráttar.
Við lentum í því að vóka yfir okkur.“
Athugasemdir