Leikarinn Nicky Katt, sem margir kannast við úr kvikmyndinni Dazed and Confused, er látinn. Samkvæmt heimildum TMZ framdi hann sjálfsvíg á heimili sínu í Kaliforníu.
Lögregluheimildir segja að lík Katts hafi fundist í íbúð hans á Los Angeles-svæðinu þann 8. apríl. Það var húseigandinn sem fann hann, en hann hafði komið í heimsókn um viku áður og minnt Katt á að greiða húsaleiguna.
Fimm dögum síðar kom hann aftur, sá að hurðin var opin og fann Katt látinn í svefnherberginu. Engin kveðjubréf fundust og talið er að hann hafi verið látinn í meira en sólarhring þegar hann fannst.
Katt fæddist í Suður-Dakóta og varð þekkt andlit í fjölmörgum sjónvarpsþáttum og kvikmyndum á níunda og tíunda áratugnum. Hann lék meðal annars í Monk, Law & Order og Boston Public, þar sem hann fór með eftirminnilegt hlutverk kennarans Harry Senate.
Hann lék einnig í kvikmyndum á borð við A Time to Kill, Sin City, Boiler Room, School of Rock, The Way of the Gun og auðvitað Dazed and Confused, þar sem hann lék harðhausinn Clint Bruno.
Katt var áður kvæntur konu að nafni Annie Morse frá 1999 til 2001, en þau skildu. Hann var 54 ára gamall.
Ef einstaklingar glíma við sjálfsvígshugsanir er bent er á Hjálparsíma Rauða krossins 1717 og netspjall Rauða krossins 1717.is. Opið allan sólarhringinn. Einnig má hafa samband við Píeta-samtökin sem veita ókeypis ráðgjöf í síma 552-2218, allan sólarhringinn. Netspjall Heilsuveru þar sem svarar hjúkrunarfræðingur er líka opið frá kl.8-22 alla daga. Fyrir þau sem misst hafa ástvin í sjálfsvígi má fá stuðning í sorg hjá Sorgarmiðstöð og hjá Pieta samtökunum.
Athugasemdir