Ný og umfangsmikil rannsókn á vegum Landbúnaðarháskóla Svíþjóðar sýnir að 17% sænskra bænda sem vinna alfarið við búrekstur sýna merki um þunglyndi. Bændablaðið fjallaði um málið.
Peter Lundquist, sem leiddi rannsóknina, segir að bændur vinni almennt of mikið og gefi sér ekki nægan tíma til hvíldar. Álagið tengist að hluta til arðsemi búanna, þeir sem hafa betri rekstur geta frekar ráðið aðstoð og þannig dregið úr álagi. Fréttin birtist á vef Land Lantbruk.
Karlmenn eldri en fimmtugir eru þeir sem virðast búa við besta andlega heilsufarið, á meðan ungar konur í mjólkurframleiðslu glíma mest við vanlíðan. Um 11% bænda segjast hafa velt því fyrir sér hvort lífið sé þess virði að lifa og 8% hafa á ferli sínum íhugað alvarlega að svipta sig lífi.
Þótt Svíþjóð skorti tölfræði um sjálfsvíg eftir starfsstéttum, hafa erlendar rannsóknir sýnt að bændur eru í meiri hættu en margir aðrir.
Í rannsókninni kom fram að margir bændur upplifa líkamlega verki, sérstaklega við mikið vinnuálag, sem getur aukið líkur á andlegri vanlíðan. Einnig komu fram samskiptavandamál innan fjölskyldunnar og milli kynslóða. Ýmsir utanaðkomandi þættir, eins og óhagstætt veður, hátt vaxtastig og kröfur frá eftirlitsstofnunum, valda einnig auknu álagi.
Lundquist segir að lykillinn að úrbótum sé að bændur sjálfir spyrji sig hvernig þeim líði og hvernig megi bæta andlega heilsu í stéttinni. Hingað til hefur málefnið ekki fengið nægilega athygli innan bændasamfélagsins, en með aukinni vitund og fræðslu vonast hann til að hægt verði að bregðast við vandanum fyrr.
Athugasemdir