Eggert Arnar Magnússon hefur verið dæmdur í þriggja mánaða fangelsi en dómurinn er skilorðsbundinn til tveggja ára. Eggert var dæmdur fyrir að hrækja á lögreglumann og var málið tekið fyrir í Héraðsdómi Reykjaness.
Í dómnum kemur fram að lögreglumenn hafi þurft að hafa afskipti af Eggerti þegar hann var að skemmta sér á Cafe Petite í Reykjanesbæ sumarið 2023. Þeir hafi verið beðnir að vísa Eggerti út af staðnum en samkvæmt lögreglunni lét hann öllum illum látum en fór að lokum. Hins vegar hafi hann snúið aftur á vettvang þegar lögreglan var að yfirgefa svæðið
Lögreglan endurtók skipun sína um að Eggert ætti að yfirgefa svæðið en hann var ekki til í það og sýndi ógnandi hegðun að sögn lögreglumanna. Hann var í kjölfarið handtekinn og hrækti á lögreglumann þegar hann var að festa sætisól hans.
Eggert neitaði sök fyrir dómi þrátt fyrir að upptaka úr búkmyndavél væri spiluð fyrir hann þar sem Eggert heyrist segja „Ég hrækti á þig“ og hrákuhljóð. Eggert telur að mögulega hafi hrákuhljóðið komið frá fólki utan bílsins. Hann sagðist einnig ekki vera fær í íslensku sökum þess að hafa búið í Svíþjóð meirihluta ævi sinnar og hann hafi verið að bulla eitthvað. Mögulega hafi hann ætlað að segja „ég get hrækt á þig“.
Í dómnum er sagt að á upptökunni megi sjá ákærða snúa líkama sínum til hægri að lögreglumanni A sem beygir sig að honum. Megi þá heyra ótvírætt hrákahljóð frá ákærða og lögreglumann segja „æ“. Í kjölfarið heyrist lögreglumaður B segja ákærða að hrækja ekki á þá og sést hrákagríma sett á ákærða. Heyrist þá ákærði segja „aðeins meira til vinstri af því að ég hrækti á þig, sko“. Skömmu síðar megi heyra lögreglumann B segja í talstöð að „hann“ sé kominn inn í bíl með hrákagrímu, „hann hafi hrækt á [A]. Síðar megi heyra lögreglumann segja við ákærða að hann hafi hrækt á lögreglumann og ákærða svara „eiiii gerði það, fuck you maður, ég hræki á þig líka ef þú vilt það“.
Eins og áður segir var Eggert fundinn sekur og dæmdur í þriggja mánaða fangelsi og þarf að greiða sakarkostnað upp á 569.440 krónur
Athugasemdir