Kraki Ásmundsson frá Heykollsstöðum í Hróarstungu er einn af þeim fáu sérhæfðu vinnuvélastjórnendum sem hafa undanfarin ár unnið að því að hlaða upp varnargarða við Grindavík vegna eldgosa sem þar hófust í lok árs 2023. Hann var þar við störf allt þar til áramótin síðustu.
Kraki var með þá reynslu og réttindi sem þurfti til að stjórna þeim stóru jarðýtum sem verkefnið krafðist og brást skjótt við þegar eftir honum var leitað. Það leiddi til þess að hann vann nánast linnulaust í um tvö ár, fjarri fjölskyldunni á Austurlandi.
„Það var spennandi að taka þátt í þessu til að byrja með en maður fór að hugsa sitt þegar 70 tonna jarðýtan sem ég var á hristist öll og skalf eins og skopparakringla,“ segir Kraki í viðtali við Austurfrétt. „Ég var tiltölulega nýbyrjaður í vinnu fyrir þetta fyrirtæki þegar kallið kom og á augabragði var ég farinn að ýta jarðvegi í garða í brennandi hita við hlið gosstraums. Hárin á hausnum risu sannarlega á köflum fyrstu dagana en eftir um það bil vikutíma þá fór þetta allt að venjast eins og annað.“
Aðstæður voru oft krefjandi að sögn Kraka. „Við vorum stundum að vinna svo nálægt glóandi hraunstraumnum að hitastigið inni í ýtunni náði alveg 40 stigum. Sjálfur er ég afskaplega lítið fyrir mikinn hita svo það var óþægilegt.“
Þó að hann hafi vanist hættunni með tímanum, segir Kraki að fyrstu dagarnir hafi verið óneitanlega skelfilegir. „Hræðsla var sannarlega fyrir hendi fyrstu dagana þó svo það hafi vanist þegar á leið. Sjálf vinnan var skemmtileg að mestu og stundum dálítill hasar í gangi ef hraunstraumur breytti um stefnu eða eitthvað slíkt. Þetta er eftirminnileg lífsreynsla, að vera með í þessu.“
Um síðustu áramót hætti hann störfum við varnargarðana og sneri aftur heim til fjölskyldunnar. Hann tók þá til starfa sem bílstjóri hjá Kubbi, sem sér nú um sorphirðu í Múlaþingi. Á heimili þeirra á Heykollsstöðum rekur fjölskyldan einnig lítinn búskap.
Hægt er að lesa lengri útgáfu af viðtalinu í Austurglugganum.
Athugasemdir