Erlendir læknar sem hafa starfað sem sjálfboðaliðar á Gaza segja að þeir hafi meðhöndlað meira en 100 börn sem höfðu verið skotin í höfuð eða brjóst. Þeir telja þetta skýrar vísbendingar um að Ísrael sé vísvitandi að miða á börn.
Í frásögnum sem hollenska dagblaðið Volkskrant safnaði lýstu 15 af 17 læknum því að hafa hitt börn undir 15 ára aldri með stök byssuskot í höfuð eða brjóst. Alls töldu þeir 114 slík tilfelli í starfi sínu á Gaza. Mörg barnanna létust en önnur lifðu af með skelfilega áverka.
„Þetta eru ekki slysaskot. Þetta eru stríðsglæpir,“ sagði bandaríski bráðalæknirinn Mimi Syed við Volkskrant. Hún skráði 18 börn sem höfðu verið skotin í höfuð eða brjóst.
Feroze Sidhwa, áverkalæknir frá Kaliforníu, sagði að hann hafi í fyrstu talið tilvikin stök atvik. En þegar hann sá nokkra drengi á einu sjúkrahúsi, alla með beint skotsár í höfuð, og síðar bar saman gögn með öðrum læknum, áttaði hann sig á að þetta væri útbreitt. „Þetta eru markviss skot. Einhver er að toga í gikkinn með barn í sigtinu,“ sagði hann.
Réttarmeinafræðingar sem Volkskrant ráðfærði sig við yfirfóru röntgenmyndir og staðfestu að sárin væru í samræmi við langdræg skot leyniskytta eða dróna, ekki sprengjubrot. Fyrrverandi hershöfðingi hollenska hersins, Mart de Kruif, sagði að fjöldi barnanna sem skotin hefðu verið í höfuð eða brjóst gerði það ótrúverðugt að um „slys“ væri að ræða.
„Þetta eru ekki fórnarkostnaður. Þetta er viljandi gert,“ sagði hann.
„Beinlínis miðað á börn“
Þetta er ekki í fyrsta sinn sem rannsóknir leiða í ljós að Ísrael miði vísvitandi á börn.
Í ágúst birti BBC World Service rannsókn þar sem yfir 160 tilfelli voru skjalfest af börnum á Gaza sem höfðu verið skotin af ísraelskum hermönnum. Í 95 af þessum tilfellum höfðu börnin verið skotin í höfuð eða brjóst, áverkar sem læknar sögðu ekki geta gefið tilefni til annars en að þau hefðu verið beinlínis skotmörk.
Samkvæmt BBC voru flest fórnarlömbin undir 12 ára aldri. Atvikin ná frá fyrstu vikum stríðsins í október 2023 og fram í júlí á þessu ári.
Ísraelski herinn hefur neitað því að hann miði markvisst á börn.
Í skýrslu sem birt var í desember undir heitinu Generation Wiped Out: Gaza’s Children in the Crosshairs of Genocide (Kynslóð þurrkuð út: Börn Gaz a í skotlínu þjóðarmorðs) sagði hins vegar Palestínska mannréttindamiðstöðin (PCHR) að Ísrael væri að fremja þjóðarmorð gegn börnum á Gaza.
Miðstöðin sakaði Ísrael um að drepa börn viljandi, valda þeim miklum líkamlegum og andlegum skaða og búa þeim aðstæður sem ætlaðar væru til að tortíma þeim.
Raji Sourani, forstöðumaður PCHR, sagði að aðferðir Ísraels hefðu gert börn að stærstum hluta fórnarlamba. „Árásir ísraelskra hernámsliða hafa markvisst beinst að börnum með því að ráðast á íbúðahverfi og skjól, og afleiðingin er sú að börn eru orðin meirihluti hinna látnu,“ sagði hann.
Samkvæmt heilbrigðisráðuneyti Gaza hafa nær 20.000 börn verið drepin af Ísrael síðan hið svokallaða stríð hófst 7. október 2023.
Að meðaltali deyja 28 börn á dag á Gaza vegna hernaðaraðgerða Ísraels og hindrana á nauðsynlegri mannúðaraðstoð, að því er Sameinuðu þjóðirnar greina frá.
Að minnsta kosti 21.000 börn hafa orðið öryrkjar í stríðinu, samkvæmt nefnd Sameinuðu þjóðanna um réttindi fatlaðs fólks, sem birti niðurstöður sínar í september.
Athugasemdir