Sigurbjörg Magnúsdóttir hefur um hríð reynt að styðja fólk á Gaza með peningagjöfum og öðrum leiðum, en í nýrri færslu á Facebook lýsir hún yfir örvæntingu vegna stöðu fjölskyldu sem hún hefur tengst tilfinningaböndum en á Gaza ríkir nú manngerð hungursneyð.
„Fjölskyldan hennar Aya Harb minnar er að deyja úr hungri!!!“ skrifar Sigurbjörg og bendir á að söfnunin fyrir þau hafi stöðvast.
Samkvæmt henni eru nú sex manns í fjölskyldunni sem deildu fyrir fjórum dögum einungis einni dollu af hummus. Ættingjar móður Ayu höfðu komið tveimur konum fyrir í tjaldinu þeirra til að hugsa um og þar með fjölgaði munnunum sem þurfa fæðu.
Tvö systkini Aya eru alvarlega veik og faðirinn féll í sprengjuárás Ísraela fyrir meira en áratug. „Þannig að það er enginn eiginmaður eða fjölskyldufaðir sem er fyrirvinna eða getur aðstoðað,“ segir Sigurbjörg. Hún bætir við að móðir Aya, Reem Harb, 46 ára hafi selt allt sem nokkurt verðmæti hafði.
„Hjálp! Hvað get ég gert?!?“ spyr Sigurbjörg og segir að hún sjálf geti lítið lagt af mörkum þar sem hún sé öryrki með fjárhag í rúst. „Ef ég væri ekki með fjárhaginn í rúst sjálf myndi ég leggja inn á hana pening en ég á bara engan. Allt hjálpar, sama hversu lítið það er. Allar deilingar eru vel þegnar.“
Með færslunni birtir hún mynd af því sem eftir stendur af heimili fjölskyldunnar og hvetur fólk til að bregðast við neyðarkallinu.
Mannlíf ræddi við Sigurbjörgu en hún segist hafa kynnst hinni 24 ára Aya Harb og eiginmanni hennar þegar þau fengu vernd hér á landi en eiginmaður hennar var staddur í Úkraínu þegar Rússar réðust á landið. Á Gaza er móðir Ayu og fimm systkyni en tvö þeirra glíma við greindarskerðingu og eru með þroska á við fimm ára börn. Faðir þeirra dó eins og áður segir, þegar hann brann inni í byggingu eftir loftárás Ísraelsmanna en í dag eru akkurat 16 ár frá andlátinu. Samkvæmt Sigurbjörgu eru nokkrir staðir þar sem hægt er að fá mat en að börn séu þar með forgang en systkini Ayu eru á unglingsaldri og ungt fólk og því ekki í forgangi. Þá sé sá litli matur sem enn er seldur á Gaza á uppsprengdu verði.
Systkini Ayu eru þau Mohammed Harb 22 ára, Ahmed Harb 21 ára, Alaa Harb 17 ára en hún er þroskaskert og með skjaldkirtils sjúkdóm, Mahmoudrami Harb16 ára, einnig þroskaskertur og Ayat Harb er yngst og verður 16 ára eftir sirka mánuð, lifi hún af.
Hægt er að leggja fjölskyldunni lið hér.
Athugasemdir