Donald Trump, forseti Bandaríkjanna, hefur vakið athygli með því að innleiða notkun F-orðsins í málfar forseta. Þannig notaði hann orðið í beinni útsendingu á háspennufundi með Volódýmýr Zelenskíj, forseta Úkraínu, í Hvíta húsinu á föstudag.
Trump svaraði spurningum blaðamanna þegar hann var spurður um samskipti við Nicolás Maduro, forseta Venesúela, og sagði hann þá: „Hann hefur boðið allt,“ sagði Trump um Maduro. „Vitið þið af hverju? Af því að hann vill ekki fokka í Bandaríkjunum.“ Eftir að hafa slakað niður blótsyrðinu áreynslulaust lauk Trump skyndilega blaðamannafundinum.
Sjónvarpsstöðvar báðu áhorfendur afsökunar á orðalagi forsetans. Þegar myndavélin færðist út frá Trump sást JD Vance varaforseti brosa og hlæja að atvikinu.
Stuðningsmenn Trump hrósuðu forsetanum á X (áður Twitter) fyrir harðorðan tóninn. „Forseti Trump notar F-orðið… honum er alvara,“ skrifaði einn MAGA-stuðningsmaður. Áhrifavaldurinn Link Lauren bætti við: „Vel staðsett F-orð er list og forseti Trump kann að nota það.“ Annar MAGA-reikningur birti: „LOL Trump sleppir F-orðinu. Vinstri menn missa vitið. Ég elska þetta!“
Aðrir voru síður hrifnir. „Trump afi kemur klaufalega fyrir í tilraun til að líta út fyrir að vera harður framan fjölmiðla,“ skrifaði einn notandi, á meðan annar kallaði framkomuna „barnalega“.
Atvikið kemur í kjölfar þess að Trump beitti svipuðu orðalagi í júní eftir að vopnahlé milli Ísraels og Írans, sem hann hafði tilkynnt fyrr, virtist fara út um þúfur.
Forsetar hafa áður vakið athygli fyrir gróft orðbragð í Hvíta húsinu. Forveri Trump, Joe Biden, vakti til dæmis furðu árið 2010 þegar hann var uppvís að því á blaðamannafundi með þáverandi forseta, Barack Obama, að segja að samþykkt heilbrigðistryggingalaganna (Affordable Care Act) væri „fokking stórt mál“. Síðar, þegar hann var orðinn forseti, heyrðist Biden kalla fréttamann í Hvíta húsinu „heimskan helvítis aumingja“ fyrir spurningu sem honum líkaði ekki, en hringdi síðar og bað hann afsökunar.
Obama vakti einnig athygli árið 2009 þegar hann sagði rapparann Kanye West „asna“ (jackass) í óopinberum hluta viðtals við CNBC, eftir að West hljóp á svið hjá MTV meðan Taylor Swift tók á móti verðlaunum fyrir besta tónlistarmyndband kvenna.
Í tilfelli Trumps er hann hins vegar að nota F-orðið í því samhengi að hóta nágrannalandi hernaðaraðgerðum og beygja það til hlýðni, en í vikunni heimilaði hann CIA „banvænar aðgerðir“ inn í Venesúela og sagðist íhuga árásir á landi, vegna meintra fíkniefnasmyglara sem hann segir vera hryðjuverkamenn og hefur verið að gera loftárásir á.
Athugasemdir