Gospelhljómsveitin GIG hefur sent frá sér nýtt lag, Hinn eini sanni Guð, sem miðlar trú, von og kærleika Guðs, boðskap sem sveitin segir heiminn þurfa á að halda.
„Draumur GIG hefur alltaf verið skýr: að gefa öðrum það sem þau eiga, trú, von og kærleika Guðs í gegnum tónlist,“ segir í tilkynningu frá sveitinni. Með nýja laginu vilja þau miðla þeirri djúpu tengingu sem þau upplifa sjálf í trúnni.
Rætur í kirkjutónlist og vináttu
GIG var stofnuð árið 2002 þegar vinir og tónlistarfélagar úr kirkjulífi ákváðu að sameina krafta sína til að skapa andlega nærandi tónlist. Í dag mynda Guðni Gunnarsson (trommur), Daney Haraldsdóttir (söngur) og Emil Hreiðar Björnsson (gítar) kjarna sveitarinnar, en þau vinna reglulega með öðrum tónlistarmönnum eftir verkefnum.
Tónlist sem bæn og tenging
Tónlist GIG er fjölbreytt, hún sveiflast á milli mýktar og kraftmikils rokks, en undirliggjandi tilgangurinn er alltaf sá sami: að skapa tengingu við Guð. Fyrir meðlimina er tónlist ekki aðeins listform heldur „bæn og leið til að kalla fram nærveru Guðs, bæði í eigin lífi og annarra.“
Um lagið Hinn eini sanni Guð
Lagið sem nú hefur verið gefið út er alþjóðlegt gospellag sem hefur ferðast víða, en GIG ákvað að fara eigin leið með því að semja íslenskan texta út frá eigin trúarreynslu.
Ferlið við gerð lagsins tók rúmt eitt og hálft ár, frá fyrstu demóupptökum til trommutaka, raddvinnslu, mixunar og masteringar. Útkoman er, að sögn sveitarinnar, lag sem hreyfir við fólki með djúpum andlegum undirtón.
„Við viljum að fólk upplifi Guð í gegnum tónlistina“
„Þetta snýst ekki um okkur heldur um að gefa af okkur,“ segja þau. Sveitin lýsir því að tónlistin gefi þeim nýjan kraft, frið og tilgang og hjálpi þeim að tengjast öðrum á dýpri hátt.
Framtíðardraumurinn er jafn skýr og hann hefur alltaf verið: að snerta hjörtu fólks. „Við viljum að fólk upplifi Guð í gegnum tónlistina. Það er upplifun sem ekkert toppar.“
Ef þau fengju að flytja eitt lag fyrir allan heiminn, væri það Hinn eini sanni Guð. „Ef þú hlustar, þá finnurðu af hverju.“
Athugasemdir