15 ára piltur játaði morð á 12 ára dreng í Birmingham

Ung­lings­piltur hefur játað að hafa orðið 12 ára dreng að bana með hnífs­tungu í Birming­ham í fyrra.

Pilt­ur­inn, sem er 15 ára en má ekki nafn­greina í bresku press­unni af laga­legum ástæðum, ját­aði fyrir dómi að hafa myrt Leo Ross með því að stinga hann í mag­ann á leið hans heim úr skóla í Birming­ham 21. jan­úar 2025. Árásin átti sér stað á stíg við árbakka í Shire Country Park í Hall Green. Veg­far­endur komu Leo til aðstoðar og köll­uðu á sjúkra­bíl, en hann lést af sárum sínum á sjúkra­húsi um klukkan 19:30 sama dag.

Leo, sem var nem­andi við Christ Church C of E Secondary Academy, er tal­inn yngsta fórn­ar­lamb hnífa­of­beldis í West Midlands-hér­aði. Fjöl­skylda hans sagði að hann hefði verið á um tíu mín­útna göngu­leið heim þegar árásin átti sér stað og lýsti honum sem „ótrú­lega góðum, hlýjum og elsku­legum“ dreng. „Ekki aðeins var líf Leo tekið, heldur líf okkar allra,“ sagði fjöl­skyldan jafn­framt.

Ger­and­inn var 14 ára þegar brotið var framið. Hann ját­aði sekt sína fyrir Birming­ham Crown Court í dag. Auk morðs­ins ját­aði hann einnig tvö til­vik alvar­legrar lík­ams­árásar með ásetn­ingi og eitt til­vik lík­ams­árásar í tengslum við fyrri árásir á aðra þolendur, auk þess að hafa borið hníf dag­inn sem Leo var myrtur. Hann neit­aði öðrum ákæru­liðum, sem voru lagðir til hliðar.

Lögregla stað­festi síðar að hnífnum hefði verið hent í nær­liggj­andi á. Einnig kom í ljós að pilt­ur­inn dvaldi á vett­vangi og ræddi við lög­reglu, þar sem hann sagð­ist rang­lega hafa fundið Leo slas­aðan við ána. Rannsókn leiddi enn fremur í ljós að hann hafði, hjólandi, ráð­ist á nokkrar konur í almenn­ings­görðum á svæð­inu fyrr sama dag. Leo hafði engin tengsl við árás­armann­inn og telja lög­reglu­yf­ir­völd árás­ina hafa verið til­vilj­un­ar­kennda og alger­lega til­efn­is­lausa.

Dómarinn, Paul Farrer KC, sagði að refs­ing yrði ákveðin 10. febr­úar og að dóm­þingið gæti staðið allan dag­inn. Þar til þá verður pilt­ur­inn vistaður í ung­menna­vistun.

Í yfir­lýs­ingu fjöl­skyld­unnar eftir and­látið sagði meðal ann­ars: „Leo verður sárt saknað. Hann var elsk­aður af öllum.“ Skólinn hélt nýlega lok­aða minn­ing­ar­at­höfn þar sem nem­endum var gefið tæki­færi til að minn­ast Leo saman.