Þrír unglingar hafa verið handteknir eftir að lögregla hóf morðrannsókn vegna skotárásar þar sem 14 ára drengur lést í Woolwich í suðausturhluta Lundúna.
Drengurinn hét Eghosa Ogbebor og fannst hann lífshættulega særður eftir að lögreglu barst tilkynning um atvikið klukkan 15:40 á fimmtudag. Þrátt fyrir viðleitni sjúkraflutningamanna á vettvangi var hann úrskurðaður látinn á staðnum.
Aðstandendum hans hefur verið tilkynnt um andlátið og njóta þeir stuðnings sérþjálfaðs starfsfólks.
Tveir unglingar, 14 og 16 ára, auk 18 ára manns hafa verið handteknir grunaðir um morð og eru allir í haldi lögreglu.
Sjónarvottar lýsa óhugnanlegum aðstæðum rétt fyrir árásina. Einn þeirra sagði að hann hefði séð „hóp vopnaðan sveðjum“ á svæðinu. „Það voru um 15 strákar, sumir fóru undir göng. Þeir dreifðust síðan allir,“ sagði hann.
Annar bætti við að lögregla hefði handtekið mann skömmu eftir atvikið við verslun nálægt vettvangi. „Ég kom hingað tíu mínútum síðar. Ég fór í búðina og lögreglan var að handtaka einhvern grunaðan um morð. Þetta var í Premier-búðinni við Greyhound-pöbbinn. Fjórir vopnaðir lögreglumenn fóru inn í Premier. Það voru samt svo margir þarna með sveðjur og fleira,“ sagði hann.
Lögregla hefur reist tjald á vettvangi og lokað svæðinu á meðan rannsókn stendur yfir. Réttarlæknar hafa hafið leit að sönnunargögnum á svæðinu.
Íbúar segja ofbeldi tengt gengjum vera algengt á svæðinu. „Það gerist margt hér sem er ekki einu sinni tilkynnt til lögreglu. Það er raunverulegt vandamál. Það sorglegasta er að enn ein móðir hefur misst son sinn,“ sagði einn íbúi.
Annar sagði að ástandið væri að versna: „Vanalega eru það hnífar, en nú eru byssur líka komnar inn í þetta.“
Rannsóknarlögreglumaðurinn Lucie Card sagði að hugsanir lögreglu væru hjá fjölskyldu drengsins og að rannsóknin væri í fullum gangi. Hún hvatti vitni til að gefa sig fram.
Borgarstjóri Lundúna, Sadiq Khan, fordæmdi árásina og sagði að slíkt ofbeldi ætti engan rétt á sér. Hann bætti við að lögregla myndi auka viðveru sína á svæðinu.
Athugasemdir