Steinar Jóhann Lúðvíksson, rithöfundur og blaðamaður, er látinn, 84 ára að aldri. Hann lést á lungnadeild Landspítalans 2. apríl síðastliðinn. Frá andlátinu greindi Mbl.is.
Steinar fæddist 30. september árið 1941 í Vestur-Húnavatnssýslu en átti mestan hluta ævi sinnar heima í Garðabæ. Foreldrar hans voru Lúðvík Jóhannesson og Ingibjörg Benediktsdóttir.
Hann útskrifaðist frá Kennaraskóla Íslands árið 1965 og hóf þá störf á Morgunblaðinu, þar sem hann starfaði sem blaðamaður til ársins 1977. Að því loknu tók hann við ritstjórastarfi hjá Frjálsu framtaki hf. og síðar gegndi hann stöðu útgáfustjóra hjá Erni og Örlygi. Frá árinu 1983 og fram til 2006 var hann aðalritstjóri Frjáls framtaks.
Steinar var virkur í starfi íþróttahreyfingarinnar og gegndi þar ýmsum trúnaðarstörfum. Hann var meðal annars formaður Samtaka íþróttafréttamanna um tíma og telst til frumkvöðla í íþróttafréttamennsku á Íslandi. Þá var hann ötull stuðningsmaður Stjörnunnar í Garðabæ, sat í stjórn félagsins og skrifaði sögu þess. Einnig var hann varaformaður Handknattleikssambands Íslands og átti sæti í stjórn Afreksmannasjóðs ÍSÍ.
Rithöfundarferill hans var afar umfangsmikill og spannaði nær sex áratugi. Hann gaf út tæplega 60 bækur á árunum 1965 til 2024. Þar ber hæst umfangsmikið ritverk um björgunar- og sjóslysasögu Íslands, Þrautgóðir á raunastund, sem kom út í 20 bindum, auk Sögu Garðabæjar í fjórum bindum. Þá skrifaði hann fjölda bóka um íþróttir og sögu þeirra á Íslandi.
Fyrir störf sín á sviði blaðamennsku og sagnaritunar hlaut Steinar riddarakross hinnar íslensku fálkaorðu árið 2018.
Steinar kvæntist Gullveigu T. Sæmundsdóttur árið 1966. Þau eignuðust tvö börn, Lúðvík Örn og Ingibjörgu Hrund, sem lést ung að aldri. Barnabörn þeirra eru þrjú.
Athugasemdir