Stefán Jökulsson, fyrrverandi lektor, útvarpsmaður og tónlistarmaður, er látinn, 76 ára að aldri.
Morgunblaðið greindi frá andláti hans.
Stefán fæddist í Reykjavík 28. desember 1949 og ólst upp í Norðurmýrinni. Hann lauk stúdentsprófi frá Kennaraskóla Íslands árið 1972 og nam síðar ensku og sagnfræði við Háskóla Íslands. Hann starfaði um árabil sem kennari við grunnskóla, meðal annars í Breiðholtsskóla, á Hallormsstað og í Austurbæjarskóla.
Á árunum 1984 til 1990 starfaði Stefán hjá Ríkisútvarpinu þar sem hann stjórnaði fjölmörgum þáttum á Rás 1. Hann sótti einnig námskeið hjá BBC í London í dagskrárgerð og stjórnun útvarpsstöðva. Þá starfaði hann síðar við auglýsingagerð, bókaútgáfu og þýðingar.
Árið 2003 hóf Stefán störf sem lektor við Kennaraháskóla Íslands og síðar Menntavísindasvið Háskóla Íslands þar sem hann sinnti kennslu á sviði miðlalæsis þar til hann lét af störfum árið 2019.
Stefán var einnig virkur tónlistarmaður og lék meðal annars með Hauki Morthens, Lúdó og Stefáni og Ragnari Bjarnasyni.
Eftir Stefán liggja þrjú börn og sex barnabörn.
Athugasemdir