Sjötíu og níu ára kona í Kaliforníu og eiginmaður hennar, 80 ára, fundust látin á heimili sínu eftir það sem lögregla telur vera manndráp og sjálfsvíg. Málið hefur vakið mikla athygli eftir að í ljós kom að konan hafði orðið fórnarlamb fjársvika af hálfu einstaklings sem sagðist vera leikarinn Tom Selleck.
Hjónin, Karen Whitaker og Donald Whitaker, fundust látin á heimili sínu í Bermuda Dunes þann 15. maí.
Yfirvöld segja að Karen hafi orðið fyrir fjárhagslegri misnotkun sem beindist að eldri borgurum, en taka jafnframt fram að engar vísbendingar séu um að sá eða þeir sem stóðu að svikunum hafi átt beina aðild að dauða hjónanna.
Talið að hún hafi sent tugþúsundir dala
Samkvæmt vinkonu hjónanna, Joy Miedecke, sendi Karen að minnsta kosti 30.000 bandaríkjadali (um 3,6 milljónir króna) á rúmu ári til einstaklings sem hún taldi vera Tom Selleck.
Miedecke sagði að svikarinn hefði fyrst haft samband við Karen í gegnum Facebook og þóst vera leikarinn. Hann hafi meðal annars sagst eiga sameiginlegan vin með henni sem væri látinn.
„Auðvitað sögðum við strax: „Nei, þetta er ekki Tom Selleck. Þetta er svindl“,“ sagði Miedecke í viðtali við NBC News þann 22. maí. „En hún vildi ekki trúa neinum.“
Eftir að þau skiptust á símanúmerum sagðist maðurinn vera að halda viðburð í nágrenninu og fékk Karen til að kaupa 80 dala miða. Síðar sannfærði hann hana um að kaupa heilt borð fyrir vini sína fyrir 800 dali.
„Þetta var bara byrjunin. Svo þurfti hann peninga fyrir hitt og þetta og upphæðirnar héldu áfram að hækka,“ sagði Miedecke.
Fjölskyldan reyndi að stöðva peningaflæðið
Samkvæmt frásögn vinkonunnar komst Donald að svikunum eftir að vinir Karenar höfðu tilkynnt málið til lögreglu og félagsþjónustu.
Fjölskyldan takmarkaði aðgang hennar að bankareikningum, en Miedecke segir að Karen hafi samt fundið leiðir til að senda peninga áfram og haldið sambandi við svikarann.
„Hún byrjaði að fela allt. Hún var að senda skilaboð allan daginn og alla nóttina. Þetta var stöðugt,“ sagði hún.
Daginn áður en Karen lést hafði hún að sögn beðið vini sína um peninga og sagt að eiginkona umboðsmanns Tom Selleck væri látin og þyrfti fjárhagsaðstoð.
„Þetta var síðasta hálmstráið fyrir Donald. Hann skammaðist sín mjög og gat ekki trúað að hún væri farin að biðja vini sína um að taka þátt í þessu svindli,“ sagði Miedecke.
Vill vara aðra við
Miedecke segir að hún hafi ákveðið að segja sögu hjónanna til að vekja athygli á hættunni sem fylgir slíkum netsvikum.
„Þegar einhver svíkur af þér allt spariféð og þú hefur enga möguleika á að vinna það aftur upp, þá þarf bara að líta á afleiðingarnar. Sjáið hvað þetta getur valdið,“ sagði hún.
Lögreglurannsókn á dauða hjónanna stendur enn yfir. Tom Selleck hefur ekki verið sakaður um neitt misferli og tengist málinu ekki á annan hátt en að nafn hans var notað af svikaranum.
Athugasemdir