Finnsk yfirvöld hafa ákært mann fyrir kynferðisbrot gegn 361 barni sem framin voru í gegnum samfélagsmiðla á árunum 2019 til 2022. Þetta kemur fram í tilkynningu frá finnsku ríkissaksóknaraembættinu sem birt var í dag
Samkvæmt yfirvöldum voru brotaþolarnir á aldrinum níu til fimmtán ára. Málið hefur vakið mikla athygli í Finnlandi vegna umfangs þess og fjölda meintra brota.
Lögreglan greindi fyrst frá rannsókninni í desember á síðasta ári og þá kom fram að grunur léki á að 27 ára gamall maður hefði framið alls 364 kynferðisbrot gegn börnum. Saksóknarar hafa nú ákveðið að fella niður þrjú þeirra mála, en ákært verður í 361 tilviki.
Rannsóknin hófst eftir að lögregla fann þúsundir mynda og myndskeiða af óþekktum börnum í farsíma mannsins árið 2022. Leit í símanum fór fram í tengslum við annað sakamál.
Samkvæmt rannsókn lögreglu hafði maðurinn samband við börnin í gegnum Snapchat þar sem hann hvatti þau til að senda sér myndir eða myndskeið af sér fáklædd eða nakin. Þá er hann einnig sakaður um að hafa farið fram á að börnin framkvæmdu kynferðislega athafnir fyrir myndavél.
Helstu ákæruliðir eru stórfelld kynferðisbrot gegn börnum, kynferðisbrot gegn börnum og stórfelld dreifing myndefnis sem sýnir börn á kynferðislegan hátt.
Maðurinn hefur að hluta játað brotin við yfirheyrslur, að sögn yfirvalda.
Réttarhöld í málinu eiga að hefjast í september.
Athugasemdir