Leikstjórinn Þórður Pálsson hefur verið ráðinn til að stýra kvikmyndaaðlögun hrollvekjuleiksins Dead by Daylight, sem framleidd verður af framleiðslufyrirtækjunum Blumhouse Productions, Atomic Monster og Behaviour Interactive.
Greint er frá þessu í Variety.
Þórður er þekktastur fyrir að hafa skapað og leikstýrt sjónvarpsþáttunum The Valhalla Murders, fyrstu íslensku Netflix-frumþáttunum, sem voru frumsýndir árið 2020. Fyrsta kvikmynd hans í fullri lengd, The Damned, kom í kvikmyndahús fyrr á þessu ári. Þá vinnur hann nú að gerð smáþáttaraðarinnar Flóðið sem fjallar um veðurfræðing sem snýr aftur til heimabyggðar sinnar til að vara við yfirvofandi náttúruhamförum.
Jason Blum, stofnandi og forstjóri Blumhouse, segir ráðninguna marka tímamót á tíu ára afmæli tölvuleiksins. Að hans sögn er Þórður sá kvikmyndagerðarmaður sem framleiðendur treysta best til að færa heim Dead by Daylight af tölvuskjánum yfir á hvíta tjaldið en yfir 60 milljón einstök hafa selst af leiknum.
Dead by Daylight er hrollvekjutölvuleikur sem kom fyrst út árið 2016. Í leiknum takast fjórir eftirlifendur á við einn morðingja í spennuþrungnum leikjum þar sem markmiðið er annaðhvort að komast undan eða stöðva flóttann. Leikurinn hefur notið gríðarlegra vinsælda á undanförnum árum og byggt upp stóran hóp dyggra aðdáenda.
Á síðustu árum hafa kvikmyndir byggðar á tölvuleikjum orðið meðal arðbærustu verkefna kvikmyndaiðnaðarins. Myndir á borð við A Minecraft Movie og The Super Mario Bros. Movie hafa skilað hundruðum milljóna dollara í tekjur og aukið áhuga framleiðenda á að færa vinsæla tölvuleiki yfir á hvíta tjaldið. Með ráðningu Þórðar er ljóst að miklar væntingar eru gerðar til Dead by Daylight kvikmyndarinnar.
Athugasemdir