Mikil sorg hefur lagt skugga á gæsun sem haldin var í aðdraganda brúðkaups Jade Jones, unnustu NBA-körfuboltastjörnunnar Tyrese Haliburton, á eyjunni St. Barts fyrr í þessum mánuði. Ein af bestu vinkonum hennar, hin 26 ára gamla Makenzi Kern, lést þar óvænt.
Samkvæmt heimildum TMZ lést Kern af heilsufarslegum ástæðum. Fjölskylda hennar telur ekkert benda til þess að andlátið tengist saknæmum verknaði, fíkniefnum eða áfengisneyslu.
Í minningargrein um Kern kemur fram að hún hafi verið umkringd nánustu vinkonum sínum í ferð sem lýst er sem „einstöku ævintýri“ þegar hún lést. Þar er hennar jafnframt minnst sem glaðværar og lífsglaðrar manneskju sem hafi ávallt getað létt lund þeirra sem voru í kringum hana.
Nánari upplýsingar um tildrög andlátsins hafa ekki verið birtar.
Kern og Jade Jones voru saman í klappstýruliði Iowa State University og héldu vinskap sínum áfram eftir skólaárin. Það var einnig þar sem Jones kynntist Haliburton, sem lék með körfuboltaliði skólans áður en hann var valinn í NBA-deildina árið 2020.
Samkvæmt heimildum lést Kern 8. júní, tveimur dögum eftir 26 ára afmæli sitt og um svipað leyti og hópurinn hugðist snúa aftur til Bandaríkjanna.
Áður en harmleikurinn átti sér stað hafði Jones birt myndir frá ferðinni á samfélagsmiðlum þar sem hópurinn virtist njóta samverunnar í undirbúningi fyrir komandi brúðkaup.
Hvorki Jones, Haliburton né aðrir úr brúðkaupshópnum hafa tjáð sig opinberlega um andlátið.
Athugasemdir