Lögmaður líffræðilegra foreldra barns sem fæddist hjá annarri fjölskyldu vegna mistaka við glasafrjóvgun hefur varað verðandi foreldra við því að velja frjósemisstofur án þess að skoða starfsemi þeirra ítarlega.
Málið vakti mikla athygli í Bandaríkjunum þegar í ljós kom að fósturvísir líffræðilegra foreldra hafði að sögn verið ranglega græddur í konu í Flórída. Barnið, stúlka sem nefnd hefur verið Shea, fæddist og var alið upp af Tiffany Score og Steven Mills, sem töldu sig vera foreldra hennar.
Rob Marcereau, lögmaður líffræðilegu foreldranna, segir að fólk sem hyggst nýta sér glasafrjóvgun þurfi að gæta fyllstu varúðar við val á frjósemisstofu. Hann leggur áherslu á að velja stofnanir sem hafi starfað lengi, búi yfir nægum úrræðum og hafi sannað sig með góðum árangri í gegnum tíðina.
Marcereau gagnrýnir jafnframt eftirlit með frjósemisiðnaðinum í Bandaríkjunum og telur að skortur á regluverki geti aukið hættu á alvarlegum mistökum. Að hans sögn koma slík atvik stundum til vegna manneklu, ófullnægjandi þjálfunar starfsfólks og þess að sum fyrirtæki leggi meiri áherslu á rekstur en heilbrigðisþjónustu.
Hann tekur þó fram að hann sé ekki að fullyrða að það hafi átt við í þessu tiltekna máli, heldur sé um víðtækari vanda innan greinarinnar að ræða. Þá ítrekar hann að markmið hans sé ekki að fæla fólk frá glasafrjóvgun heldur hvetja það til að kynna sér þjónustuaðila vel áður en ákvörðun er tekin.
Í millitíðinni hafa líffræðilegir foreldrar stúlkunnar og þau hjón sem gengu með hana og hafa alið hana upp náð samkomulagi um forsjá hennar. Samkvæmt því munu Tiffany Score og Steven Mills áfram gegna hlutverki aðalforráðamanna barnsins.
Marcereau segir skjólstæðinga sína reyna að takast á við afar erfiðar og óvenjulegar aðstæður með hagsmuni barnsins að leiðarljósi. Hann segir að þrátt fyrir allt sé meginmarkmiðið að tryggja stúlkunni sem best uppeldi og stöðugleika til framtíðar.
Athugasemdir