Héraðsdómur Reykjaness hefur dæmt Fabrice Stephane Marie Peytavin í 22 mánaða fangelsi fyrir stórfellt fíkniefnalagabrot eftir að hann flutti tæplega 1,7 kíló af kókaíni til landsins í apríl á þessu ári.
Samkvæmt dóminum kom Peytavin til landsins sem farþegi með flugi frá París til Keflavíkurflugvallar sunnudaginn 19. apríl 2026. Í farangri hans fundust alls 1.704,57 grömm af kókaíni með 79–84 prósenta styrkleika. Fíkniefnin voru falin í farangrinum og talin ætluð til söludreifingar hér á landi í ágóðaskyni.
Ákærði játaði brotið skýlaust við þingfestingu málsins.
Við ákvörðun refsingar leit dómurinn meðal annars til þess að Peytavin hafði ekki áður gerst sekur um refsiverða háttsemi samkvæmt framlögðu sakavottorði. Einnig var tekið fram að rannsókn málsins benti ekki til þess að hann hefði átt fíkniefnin eða komið að skipulagningu innflutningsins með öðrum hætti en að samþykkja að flytja þau til landsins gegn greiðslu. Þá þótti hann hafa verið mjög samvinnuþýður við rannsókn málsins.
Á hinn bóginn lagði dómurinn áherslu á að um hefði verið að ræða mikið magn af sterku kókaíni sem ætlað var til dreifingar hér á landi og að þáttur burðardýrs væri ómissandi í slíkri brotastarfsemi. Að virtum öllum atvikum þótti hæfileg refsing vera 22 mánaða fangelsi.
Athugasemdir