Söngkonan Björk Guðmundsdóttir er komin í samband með mósambísku tónlistarkonunni, framleiðandanum og hönnuðinum Yöru Polana, sem kemur fram undir listamannsnafninu Monace. Sambandið varð opinbert þegar Polana birti mynd af þeim saman á samfélagsmiðlum og skrifaði meðal annars: „Ég gæti ekki óskað mér betri kærustu,“ auk þess sem hún bætti við orðunum „amo-te“ („ég elska þig“ á portúgölsku). Vísir sagði frá málinu.
Greint hefur verið frá því að þær hafi sést saman víða á Íslandi undanfarna mánuði, meðal annars á veitingastað í Reykjavík og á tónleikum Bjarkar fyrr á árinu.
Yara Polana er 37 ára gömul og hefur búið á Íslandi í tæp fjórtán ár. Hún er menntuð í grafískri hönnun frá Listaháskóla Íslands, hefur starfað sem forritari og rekur tónlistarfyrirtækið Oktaves, sem styður sjálfstætt tónlistarfólk.
Björk, sem er einn þekktasti tónlistarmaður Íslands á alþjóðavísu, var áður í sambandi með listamanninum Matthew Barney. Hún hefur lítið tjáð sig um einkalíf sitt undanfarin ár og þegar Mannlíf falaðist eftir staðfestingu á sambandi þeirra Yöru í júní, vildi Björk ekki tjá sig.
Athugasemdir