Dómari í Flórída hefur úrskurðað að Donald Trump Bandaríkjaforseti verði að afhenda fjárhagsgögn sem BBC hefur farið fram á í tengslum við 10 milljarða dollara meiðyrðamál sem hann hefur höfðað gegn breska ríkisútvarpinu.
Úrskurðurinn var kveðinn upp við fyrstu fyrirtöku málsins. Trump höfðaði málið vegna þáttarins Panorama, þar sem mismunandi hlutar úr ræðu hans á degi árásarinnar á þinghúsið í Washington 6. janúar 2021 voru klipptir saman.
Dómarinn Enjoliqué Lett féllst á kröfu lögmanna BBC um að Trump afhendi fjárhagsgögn sem eru í vörslu Donald J. Trump Revocable Trust, sjóðs sem Trump stofnaði til að halda utan um viðskiptahagsmuni sína meðan hann gegnir embætti forseta.
Úrskurðinum, sem var kveðinn upp á þriðjudag í Miami, má enn áfrýja.
BBC vill sönnun fyrir fjárhagstjóni
Ákvörðunin telst þó ákveðinn sigur fyrir BBC, sem hefur krafist þess að Trump leggi fram gögn sem styðji fullyrðingar hans um að umrædd klipping á Panorama-þættinum hafi valdið honum fjárhagslegu tjóni.
Dómarinn komst jafnframt að klofinni niðurstöðu varðandi aðra kröfu BBC um afhendingu gagna sem tengjast árásinni á þinghúsið sjálfa.
Málið er nú á svokölluðu gagnaöflunarstigi, þar sem báðir málsaðilar þurfa að afhenda skjöl og önnur gögn sem kunna að verða notuð sem sönnunargögn fyrir dómi.
BBC segir Trump hafa afhent aðeins 735 blaðsíður
Lögmenn BBC sögðu fyrir dómi að útvarpsfélagið hefði þegar afhent um 87.000 blaðsíður af gögnum, á meðan lögmenn Trump hefðu aðeins lagt fram 735 blaðsíður.
Þeir héldu því fram að um væri að ræða „sýndargagnaafhendingu“, þar sem skjölin væru að mestu fréttagreinar og annað efni sem hefði verið sótt af internetinu.
Lögmaður BBC, Charles Tobin, sagði því að gagnaöflunin hefði verið „algjörlega einhliða“.
Lögmaður Trump, Alejandro Brito, hafnaði þeirri gagnrýni og sagði kröfur BBC um afhendingu gagna vera bæði „íþyngjandi“ og „allt of víðtækar“.
Hann mótmælti einnig kröfum um gögn sem tengjast samtölum Trumps við ráðgjafa sína um árásina á þinghúsið, auk stefna sem BBC hefur sent alríkisstofnunum og fyrrverandi embættismönnum.
Lögmenn Trumps sökuðu BBC um að stunda svokallaða „veiðiferð“ (fishing expedition) með það að markmiði að áreita fyrrverandi embættismenn.
Byggja meðal annars á afsökunarbeiðni BBC
Stór hluti málflutnings lögmanna Trumps snerist um bréf sem stjórnarformaður BBC, Samir Shah, sendi forsetanum í nóvember á síðasta ári.
Í bréfinu bað Shah afsökunar á umræddu myndskeiði og sagði að það hefði óviljandi skapað þá röngu mynd að Trump hefði beinlínis hvatt til ofbeldis.
Brito sagði bréfið fela í sér bæði „viðurkenningu“ og „játningu“ af hálfu BBC.
BBC hefur áður farið fram á að málinu verði vísað frá og byggir þá kröfu meðal annars á því að Panorama-þátturinn hafi aldrei verið sýndur í Bandaríkjunum. Dómstóllinn hefur enn ekki tekið afstöðu til þeirrar kröfu.
Athugasemdir