Tónlistarmaðurinn og tónskáldið Gunnar Þórðarson er látinn, 81 árs að aldri. RÚV sagði frá andlátinu. Hann var einn áhrifamesti og fjölhæfasti tónlistarmaður landsins og setti djúp spor í íslenska tónlistarsögu.
Gunnar fæddist á Hólmavík 4. janúar 1945 en ólst upp í Keflavík. Hann var meðal annars meðlimur í Hljómum, Trúbroti, Ríó Tríó og Lummunum og samdi fjölda laga sem skipa sess meðal þekktustu dægurlaga þjóðarinnar.
Á löngum ferli kom Gunnar víða við sem lagahöfundur, gítarleikari, söngvari, upptökustjóri og útsetjari. Hann samdi einnig tónlist fyrir kvikmyndir og óperuna Ragnheiði, sem sló aðsóknarmet í Íslensku óperunni.
Framlag hans til íslenskrar tónlistar var margsinnis heiðrað. Hann hlaut meðal annars heiðursverðlaun Íslensku tónlistarverðlaunanna árið 1996, fálkaorðuna árið 2002 og var útnefndur borgarlistamaður Reykjavíkur árið 2014. Þá var hann fyrsti popptónlistarmaðurinn sem hlaut listamannalaun.
Eftirlifandi eiginkona Gunnars er Sigrún Toby Herman. Hann eignaðist fimm börn, þar af eru fjögur á lífi.
Hér fyrir neðan má sjá viðtal sem Reynir Traustason, þáverandi ritstjóri Mannlífs tók við Gunnar fyrir fjórum árum en þar ræddi hann á einlægan hátt um veikindi sín, rokkið, neysluna í denn og fleira. Viðtalið er eitt það síðasta sem tekið var við Gunnar.
Athugasemdir