Maðurinn sem skaut á fjöldamorðingjann við In-N-Out Burger-veitingastað í Twin Falls í Idaho um helgina segir árásarmanninn hafa „brotnað saman“ andlega og flúið þegar skot fóru að dynja í kringum hann.
Jordan Salinas ræddi við ABC News á mánudag og lýsti atburðarásinni í smáatriðum. Árásarmaðurinn, Chad Williams, skaut þrjá til bana og særði sjö áður en hann svipti sig lífi.
Salinas sagðist hafa komið sér fyrir á bak við umferðarskilti nálægt veitingastaðnum og beint skoti sínu að Williams, sem þá stóð með riffil og miðaði á bíla sem óku hjá.
Að hans sögn virtist Williams vera fullkomlega rólegur á meðan hann beindi vopni sínu að ökutækjunum. Þegar Salinas hóf hins vegar að skjóta breyttist allt.
„Allur stærilætisgangurinn hvarf,“ sagði Salinas og bætti við að árásarmaðurinn hefði „brotnað saman“ tilfinningalega áður en hann hljóp af vettvangi.
Lögreglumaður, sem var ekki við störf á þeim tíma, tók einnig þátt í skotbardaganum og skaut að Williams.
Lögreglustjórinn í Twin Falls, Matthew Hicks, sagði að lík Williams hefði fundist skammt frá með skotsári sem hann veitti sjálfum sér.
Hicks hrósaði bæði Salinas og lögreglumanninum fyrir viðbrögð þeirra og sagði þá hafa komið í veg fyrir að árásarmaðurinn gæti valdið frekara manntjóni með því að hrekja hann af vettvangi.
Athugasemdir