Bergey Stefánsdóttir hefur tekið við starfi stjórnanda íþrótta- og frístundamála hjá Fjarðabyggð. Alls bárust ellefu umsóknir um starfið samkvæmt tilkynningu.
Bergey hefur starfað hjá sveitarfélaginu frá árinu 2015 og hefur víðtæka reynslu af þjónustu við börn, ungmenni og fjölskyldur. Hún er með BA-gráðu í félagsráðgjöf og diplóma í barnavernd auk þess sem hún stundar nú meistaranám í forystu og stjórnun.
Undanfarin ár hefur Bergey starfað á fjölskyldusviði Fjarðabyggðar, meðal annars við félagsþjónustu og barnavernd. Nú síðast var hún verkefnastjóri farsældar barna og tók þátt í að leiða innleiðingu laga um samþætta þjónustu í þágu farsældar barna.
Bergey segir áhuga sinn á íþrótta- og frístundastarfi mikinn og að hún hafi lengi fylgst með uppbyggingu starfsins fyrir börn og ungmenni í sveitarfélaginu. Hún leggur áherslu á að skapa öruggt og uppbyggilegt umhverfi þar sem börn og ungmenni geti myndað tengsl, eflt sjálfstraust og félagsfærni og fundið styrkleika sína.
Í nýju starfi hyggst Bergey leggja áherslu á gott samstarf við starfsfólk, iðkendur, foreldra og félagasamtök.
Markmiðið sé að efla enn frekar íþrótta- og frístundastarf í Fjarðabyggð. Börn og ungmenni verði áfram í forgrunni en jafnframt verði lögð áhersla á tækifæri fólks á öllum aldri til þátttöku. Slík þátttaka styrki bæði lýðheilsu, félagsleg tengsl og samfélagið í heild.
Athugasemdir