Þrír erlendir ríkisborgarar hafa verið úrskurðaðir í gæsluvarðhald eftir að lögreglan á Norðurlandi vestra stöðvaði bifreið þeirra við hefðbundið umferðareftirlit síðastliðið fimmtudagskvöld. Við leit í bifreiðinni fannst talsvert magn af munum sem grunur leikur á að séu þýfi.
Frá þessu greinir lögreglan á Norðurlandi vestra í tilkynningu.
Bifreiðin var á suðurleið þegar lögregla stöðvaði hana vegna gruns um of hraðan akstur. Þrír erlendir ríkisborgarar voru í bílnum. Ökumaðurinn framvísaði ökuskírteini en ekki reyndist unnt að bera kennsl á hina tvo á vettvangi þar sem þeir kváðust ekki vera með skilríki meðferðis.
Við nánari athugun lögreglu kom í ljós að fólkið hafði ítrekað komið við sögu lögreglu undanfarnar vikur, meðal annars vegna mála er vörðuðu dvalarleyfi og gruns um þjófnaði.
Þremenningarnir voru í kjölfarið handteknir og bifreiðin flutt á lögreglustöðina á Blönduósi. Þar var framkvæmd leit í bílnum og fundust peningar, skartgripir og ýmsir aðrir munir sem lögregla telur að kunni að vera þýfi.
Á lögreglustöðinni var fólkinu jafnframt birt ákvörðun Útlendingastofnunar um brottvísun frá Íslandi og sjö ára endurkomubann.
Lögreglustjórinn á Norðurlandi vestra fór í kjölfarið fram á gæsluvarðhald yfir fólkinu þar til unnt yrði að flytja það til heimalands síns. Héraðsdómur Norðurlands vestra féllst á kröfuna og úrskurðaði fólkið í allt að þriggja vikna gæsluvarðhald.
Landsréttur staðfesti úrskurð héraðsdóms þriðjudaginn 18. ágúst, en stytti gæsluvarðhaldstímann úr þremur vikum í tvær.
Athugasemdir