Flugvél á leið frá Skotlandi til Tenerife fékk forgang til lendingar á Tenerife South-flugvellinum eftir að farþegi um borð veiktist alvarlega.
Áhöfn vélarinnar óskaði eftir brýnni læknisaðstoð þegar ástand farþegans versnaði skyndilega á meðan á fluginu stóð. Jafnframt var óskað eftir því að viðbragðsaðilar yrðu tilbúnir við komu vélarinnar.
Flugumferðarstjórar hjá stjórnstöð Kanaríeyja virkjuðu í kjölfarið viðbragðsáætlun vegna neyðartilviksins.
Vélin fékk forgang fram yfir aðra farþegaflugumferð á svæðinu til að stytta eins og kostur var þann tíma sem tæki að koma farþeganum undir læknishendur.
Starfsmenn flugvallarins og viðbragðsaðilar voru látnir vita af stöðunni og sjúkrabíll ásamt heilbrigðisstarfsfólki beið vélarinnar.
Þegar dyr vélarinnar voru opnaðar fóru sjúkraflutningamenn um borð þar sem þeir hlúðu að farþeganum. Hann var í kjölfarið fluttur á sjúkrahús á Tenerife til frekari meðferðar.
Ekki hafa verið veittar frekari upplýsingar um líðan eða ástand farþegans.
Atvikið kemur aðeins nokkrum dögum eftir að önnur flugvél frá Bretlandi þurfti að fá forgangslendingu á Tenerife South vegna veikinda farþega. Þann 3. september fékk flugvél á leið frá Leeds sambærilegan forgang og aðstoð við lendingu vegna neyðartilviks um borð.
Athugasemdir