Grunaður morðingi var handtekinn í Dayton í Ohio í Bandaríkjunum eftir dramatískan flótta undan lögreglu sem lauk með því að hann ók lögreglubifreið inn í íbúðarhús.
Lögreglan í Dayton hefur birt myndskeið af eftirförinni, sem átti sér stað í síðustu viku. Þar sést silfurlituð Toyota-bifreið aka á miklum hraða fram hjá vettvangi umferðarslyss. Lögreglumenn hófu þegar eftirför sem lauk skömmu síðar þegar bifreiðin hafnaði á tré.
Ökumaðurinn yfirgaf þá bifreiðina og reyndi að komast undan á hlaupum. Lögreglumenn eltu manninn, en honum tókst að komast aftur að lögreglubifreiðum sem skildar höfðu verið eftir. Hann stökk upp í eina þeirra og ók á brott.
Ný eftirför hófst og ók maðurinn á miklum hraða um götur borgarinnar. Hann missti að lokum stjórn á lögreglubifreiðinni og ók í gegnum framhlið íbúðarhúss. Bifreiðin olli töluverðum skemmdum inni í húsinu.
Enginn þeirra sem voru inni í húsinu slasaðist alvarlega. Lögreglu tókst að yfirbuga manninn á vettvangi, en hann er sagður hafa bitið einn lögreglumann við handtökuna.
Að sögn lögreglunnar í Dayton er maðurinn grunaður um morð í nágrannasveitarfélaginu Miami Township. Þá er hann einnig grunaður um aðild að nokkrum öðrum alvarlegum afbrotum.
Athugasemdir