Lögregla í Portsmouth á Suður-Englandi hefur bannað þátttakendum í fyrirhuguðum mótmælum og gagnmótmælum á laugardag að hylja andlit sín með grímum. Ákvörðunin er tekin vegna ótta við frekari óeirðir eftir átök í borginni um síðustu helgi.
Mótmælendur sem lýsa sér sem „föðurlandsvinum“ hyggjast safnast saman í Portsmouth um hádegisbil. Hópurinn er undir forystu manns sem lengi hefur verið bandamaður hægriöfgamannsins Stephen Yaxley-Lennon, betur þekkts sem Tommy Robinson.
Samtökin Stand Up to Racism hafa boðað til gagnmótmæla á sama tíma.
Mikil spenna ríkir í borginni eftir að til átaka kom milli mótmælenda og lögreglu síðastliðinn sunnudag. Þá reyndu mótmælendur, margir svartklæddir og með grímur fyrir andliti, að koma í veg fyrir að hópur hælisleitenda yfirgæfi svæðið. Hælisleitendurnir höfðu komið til Bretlands á smábát eftir að hafa farið yfir Ermarsund frá Frakklandi.
Opinberar bifreiðar skemmdust í átökunum og nokkrir lögreglumenn særðust. Bresk stjórnvöld fordæmdu óeirðirnar og lýstu framferði mótmælenda sem ofbeldisfullu.
Daginn áður höfðu hundruð grímuklæddra mótmælenda safnast saman í Dover og lokað tímabundið aðkomu að fjölfarinni höfn bæjarins. Þar var einnig mótmælt komu fólks yfir Ermarsund.
Lögreglan í Hampshire, sem fer með löggæslu í Portsmouth, segir bannið við andlitshylmingum eiga að draga úr hættu á ofbeldi, hótunum og annarri refsiverðri háttsemi. Vísað er til nýlegra atvika þar sem minnihluti mótmælenda hafi reynt að trufla friðsamleg mótmæli með ofbeldi og ógnandi hegðun.
Stjórnmálamenn úr ólíkum flokkum hafa fordæmt óeirðir síðustu helgar og kennt öfgahægriöflum um að hafa kynt undir þeim. Shabana Mahmood innanríkisráðherra fundaði með yfirmönnum lögreglu á fimmtudag vegna stöðunnar.
Breska lögreglan fékk á síðasta ári auknar heimildir til að banna andlitshylmingar á mótmælum. Bannið í Portsmouth tekur gildi klukkan níu á laugardagsmorgun og verður í gildi á afmörkuðu svæði borgarinnar í sólarhring.
Athugasemdir