Tyrkneska lögreglan réðst í dag inn á samkomustaði hinsegin fólks og heimili LGBTQ-aðgerðarsinna víða um land. Fjöldi fólks var handtekinn og rannsókn hafin á tugum einstaklinga, félagasamtökum og fyrirtækjum.
Akin Gürlek, dómsmálaráðherra Tyrklands, greindi frá því að aðgerðirnar hefðu farið fram undir yfirskriftinni „Fjölskylda mín er örugg“ og náð til 15 héraða, þar á meðal Istanbúl og Ankara.
Að sögn ráðherrans hefur verið hafin málsmeðferð gegn 162 einstaklingum, níu samtökum og 13 fyrirtækjum. Hann upplýsti ekki hversu margir hefðu verið handteknir en sagði aðgerðirnar tengjast átaki stjórnvalda sem Recep Tayyip Erdogan Tyrklandsforseti hefur kennt við „áratug fjölskyldunnar“. Markmiðið sé meðal annars að vernda börn, fjölskylduna sem stofnun og samfélagsskipan.
Í Istanbúl réðst lögregla meðal annars inn á nokkra bari sem einkum eru sóttir af samkynhneigðum og næturklúbb sem hefur verið þekktur sem griðastaður hinsegin samfélagsins. Þá var einnig gerð aðgerð á tyrknesku baðhúsi sem grunur leikur á að tengist vændi.
Hinseginréttindasamtökin Kaos GL segja að fleiri en tíu félagsmenn þeirra hafi verið handteknir eftir húsleitir á heimilum þeirra. Samtökin halda því jafnframt fram að fjölmörgum vefsíðum og samfélagsmiðlareikningum hafi verið lokað.
Að sögn Kaos GL saka yfirvöld samtökin um að hafa birt efni sem teljist klámfengið eða ósæmilegt og hafi verið aðgengilegt börnum. Yfirvöld höfðu áður krafist þess að reikningi samtakanna á X yrði lokað, auk reikninga um 15 annarra hinsegin samtaka.
Samkynhneigð er ekki refsiverð í Tyrklandi en Erdogan hefur ítrekað beitt harðri orðræðu gegn hinsegin fólki. Özgül Saki, þingmaður vinstrisinnaða DEM-flokksins, fordæmdi aðgerðirnar og sagði ekki hægt að banna eða takmarka tilvist hinsegin fólks.
Athugasemdir